Shillong, Nohprah 16
Ka Hynñiewtrep Integra-ted Territorial Organization (HITO) ha ka Lah Sngi U Blei jong ka 16 tarik Nohprah, 2024 hapoh ka jingïalam u President, Bah Donbok Dkhar bad General Secretary, Bah Wanbun N Dkhar ka la leit ban buddien biang ïa ka dorkhas kaba la dep ban buh hakhmat u Director ka Directorate of Mineral Resources (DMR) ka Sorkar Jylla ha kaba ïadei bad ka jingbym soi NOC u Director katei ka tnat sha ki nongshalan dewïong.
Na ka liang ka seng ka la leit ban buh ïa ka dorkhas ha ka 27 tarik Rymphang, 2024. Hynrei ha kane ka jingleit pan jingpynshai jong ka seng ha katei ka sngi, la ïoh jingtip ba u Director uba la pdiang ïa kane ka dorkhas, u Pius D Sangma u la shongthait noh na ka kam bad kaba la kham pynbitar ïa ka seng ka long ba katei dorkhas ruh kam don shuh ha katei ka ophis treikam.
Haba kren sha ki lad pathai khubor, u General Secretary ka seng, Bah Wanbun N Dkhar u la ong ba don ki trai par dewïong kiba la wan pyntip sha ka seng wat la ki la dep ban siew ïa ka bai Cess, GST bad kiwei-kiwei ki jingsiew hynrei ki la hap ban siew sa ïa kiwei pat ki jingsiew ne ki khajna sha ki briew ki bym tip ki dei kiei.
“Ngi kwah ban wad jingtip bad wad bniah halor kata ka jingsiew nalor ba la dep ban siew ïa ki jingsiew kiba dei ban siew katkum ki kyndon ba la buh da ka Sorkar”, ong u Bah Dkhar. U Bah Dkhar u la ong ba lehse kine ki briew kiba shim ïa kane ka pisa ki lah ban dei ki briew jong ka Sorkar ne ki ‘High-level’. Kumta na ka liang ka seng ka pynrem jur halor ka jingleh ‘High level’ jong ka Sorkar da kaba maham jur ba lada ka Sorkar ka dang ïai bteng ban leh ïa kum kine ki jait kam ban phah siew pisa ïa ki briew wat hadien ba ki la dep ban siew ruh, ka seng kam banse ban leh da ka kam kaba tyngeh.
“Lada ka Sorkar ka dang ïai bteng ban leh ïa kane ka kam ‘High level’, ngi kum ka seng ngim banse ban hiar biang sha madan sa shisien ban pyni sha u paidbah ba ngi don bad u paidbah bad ngi khmih lynti ba u paidbah un ïatreilang bad ngi khnang ba ngin lah ban rat dyngkhong ïa kine kiei-kiei ki jingjyrsieh hapoh ka Jylla jong ngi”, bynrap u Bah Dkhar.
Na ka liang u President, Bah Donbok Dkhar u la ong ba ka jingleit buh dorkhas jong ka seng ka dei hadien ba ki don ki briew kiba aplai lane ki ‘bidder’ kiba dei ban ïoh ïa ka ‘challan’ hynrei ki khlem ïoh satia namar ba ki hap ban ïoh ïa ka NOC ka ban soi da u Director ka tnat. Hynrei kaba sngewphylla pat ka long ba ka dorkhas ba la phah da ka seng halor kane kajuh ka bynta ka khlem don satia hapoh ka ophis treikam jong ka tnat bad lyngba kane ka jingpynjah jong u Director barim ïa ka dorkhas, ka pynpaw shai ba ki don shisha ki kam jyrsieh hapoh katei ka ophis treikam bad ba kita ki ‘High Level’ ruh ki don kiba ju shim pisa tam na ki trai par dewïong.
U Bah Donbok u la ong ruh ba lada ka Sorkar kam lah ban pynbeit mardor halor kane, ka seng kan sa shim noh da ka sienjam kaba tyngeh ha kaba kan sa wan ban shong ïakhih shisyndon hapoh ka phyllaw jong katei ka ophis treikam ha u snem ban wan.
“Lada ki leh tam, ngim banse ban ïatam lang hi namar phin ktah ïa ka ïoh-ka kot jong ka Jylla hi, ngin ym shah da lei-lei ruh bad ngi kynnoh ba ka don ka jingbamsap kaba shyrkhei lyngba u Director barim lym kumta kane ka dorkhas jong ngi kan ym jah hi ruh”, bynrap u Bah Donbok Dkhar.
