
Shillong, Nohprah 16
U Manager ka Manchester City, Pep Guardiola, u la ïakynduh ïa ka jingeh kiba u khlem pat ju jia mynno mynno ruh ha ka samoi ïalehkai namar ka ka kynhun jong u ka la shah rem noh ha ka Manchester United da 2-1 ha la ïing ha ka Sngi U Blei.
Wat la ka Man City ka la lamkhmat ha ka Premier League da kaba rah ïa ka nam lahduh haduh saw tylli ki samoi ïalehkai ryngkat bad ka la lum ïa ki khusnam kiba itynnad. Hynrei ka jing-angnud ka Man City ban ïai long ka kynhun kaba khlaiñ bor kam shym la urlong, namar ka la shah rem phra sien na khatwei tylli ki jingïalehkai ba la dep jong baroh ki lympung ïalehkai.
Ha ka jingpdiang kaba shai, u la kam ba ki don ki jingduna ha u da kaba ong, “Nga dei u boss, nga dei u manager, bad ngam long uba biang namar ngam shym la lah ban leh ïa kaba bha tam na ka bynta ka kynhun bad kane ka long ka jingshisha.”
Kumba ka paw ka jingdon u Guardiola ha ka Manchester City kan ïai long ka jingsah kynmaw lyngba ki jingjop bad ban khur haduh 15 tylli ki trophy kiba heh, kynthup ïa ka Champions League.
Pynban ka jingïaleh-kai kaba mynta ka pyni ïa ka por kaba eh tam ha ka jingim jong u kum u coach, kaba la pynlong ïa u ban jop 33 tylli ki khusnam ba heh ha baroh ki por ba u la don ha Barcelona, Bayern Munich, bad City.
Wat la u la soi ïa ka kontrak kaba jlan sa ar snem bad ka City, hynrei ka kynhun jong u Guardiola kam pat lah ban ïalehkai bha. Ka jingshah rem ha ka Manchester United da 2-1 kol, ha kaba ka City ka la shah thep kol hadien lyngba u Bruno Fernandes bad u Amad Diallo, ka la nang pynjynjar shuh shuh ïa ka jingïakhun jong ki bad ka la wanrah ïa ka jingkynthoh na ki nongkyrshan kiba la sngewsih.
U Guardiola u la kam ba u la ïakynduh jingeh naduh ba ka kynhun jong u ka la mad ha kane ka samoi, da kaba ong, “Nga la tip ba kan dei ka samoi kaba eh naduh kaba sdang. Nga la ong la bunsien, wat ha ka por ba ngi dangjop, hynrei ngam shym la khmih lynti ba kan long kumta.”