Tura, Nohprah 16
Da kaba shim ïa ka sienjam kaba tyngeh pyrshah ïa ki trok na Bhutan kiba ju pyndonkam ïa ki surok bapher-bapher ka Jylla ban shalan ïa ki maw sha Bangladesh – ym duna ïa 15 tylli ki trok ki la shah bat noh ha ki pulit ka West Garo Hills hajan khappud Assam – Meghalaya ha Rongsai hapoh ka thanat Tikrikilla hadien ba baroh ki la wan ha ryngkat ka jingkit kaba palat pud.
Kane ka la wan jia hadien ki jingujor na ki bynta bapher-bapher jong ka imlang-sahlang halor ki trok kit maw na ka ri marjan kiba ïaid lait na ki aiñ jong ka India ha ka kyrteng jong ka khaïi-pateng. Ki trok ki wan bad ki jingkit kiba palat ïa ka 40-50 MT katba ka jingthew ba la shah, ka long kham duna ïa kane.
Ha shuwa, ïa ki trok na Bhutan la shah ban pyndonkam ïa ka surok AMPT lyngba ka Tikrikilla – Phulbari (bad palat ïa kane) ban bteng ïa ka jingshalan ïa ki maw sha Bangladesh. Hynrei wat hapdeng ki jingmaham kiba na ka por sha ka por na ki bor pynïaid kumjuh na ki nongshong shnong, ka jingshalan shabar ri ka la bteng ha ryngkat ki jingkit kiba palat ar shah ban ïa kaei kaba la shah.
“Ki la don ki trok kiba wan ryngkat bad ka jingkit kaba palat 60-70 MT katba ka jingbuh kyndon ka long tang ïa ka trok 3 ‘Axle’ (18 MT). Ki la ai daw ba ki don bun tylli ki khyrdop (kiba long aiñ bad ba be-aiñ) ha kaba ki hap ban siew khajna bad kim banse ban kit palat pud namar ki jingduhnong. Kane ka la bteng haduh 3-4 bnai ha shuwa ba ka jingbteng jong ki ban leh ïa kane ka kam be-aiñ ka la pynlong ïa kawei ka jingkieng hajan Hallidayganj ban julor,” ong uwei u nongshong shnong ka Phulbari.
Ka jingjulor jong ka jingkieng ka la pynlong ïa ka jingshalan mar shabar ri lyngba ka surok AMPT ban sangeh shi syndon. Hynrei dang shen, la sdang biang ïa kane kajuh ha kaba la shah ban pyndonkam ïa baroh ar tylli ki surok – AMPT kumjuh ka surok Paikan – Tura – Dalu (NH – 51).
Ki jingeh ki la sdang mardor hadien ba ki trok sa shisien ki la sdang ban pynkheiñ ïa ki aiñ ïaid kali jong ka India da kaba kit palat pud ban ïa kaei kaba la shah – ha kane ka kynti wat ban ïaid lyngba ka sor Tura. Ka jingujor na uwei u nongshong shnong sha ki pulit ka la pynlong ïa ki trok ban shah pynsangeh bad phah phai biang.
Hynnin ka sngi, ki trok sa shisien ki la pyrshang ban pyndonkam ïa ka surok AMPT, ha kaba kum kane ka jingkit be-aiñ ka la ïaid khlem kano-kano ka jingtip ban shalan biang sa shisien. Ki pulit ki la pynsangeh ïa kine bad bat ïa ki hajan Rongsai bad katkum ka jingïoh jingtip, yn sa phah phai biang noh ïa ki.
“Ki ïaid lait ïa baroh ki aiñ ha ka kyrteng jong ka jingshalan bad pynsniew ïa ki surok jong ngi. Ka AMPT ka dei ka surok jong ka Jylla kaba la khmih da ka NEC PWD bad ki pyndonkam da ki trok 16-18 shaka (trailer) ban pynkit ïa ki mar hapdeng ka Bhutan bad Bangladesh. Ngim sngew pyrshah ïa ka jingshalan namarba ka dei ka jingïateh kular hapdeng jong kine ki ri, hynrei ïa kine, yn hap ban leh da kaba bud ryntih ïa ki aiñ jong ka India,” la pynsngew sa uwei pat u nongshong shnong ka Tikrikilla.
Haba kren halor kane ka phang, u Superintendent of Police ka WGH, u Abraham T. Sangma u la ong ba la pyntip sha baroh ki OC/IC ban pyntikna ïa ka jingbud ryntih haba ïadei bad ka jingkit khia kaba la shah.
“U Majistor ka distrik u la shah ïa ki trok 3 ‘Axle’ ban shalan ïa ki maw kiba na Bhutan. Ngi la pynsangeh ïa ki trok hajan Rongsai namarba ki la kit palat pud. La phah phai biang ïa. Ngin pyntikna ïa ka jingbud ryntih ïa ki aiñ ban pynduna ïa kino-kino ki jingujor,” la pynskhem u SP.
Katkum ki tyllong khubor, kine ki trok ki siew haduh T.45,000 shi trok ban ïaid lyngba ar tylli ki Jylla – Assam bad Meghalaya ha kaba bun ki dei ki nongïoh jingmyntoi kiba la ïarap ban pyntikna ïa ka leit ka wan na Bhutan sha Bangladesh, na bynta kine ki trok kit maw kiba ïaid be-aiñ, ki la ïaid khlem jingeh.
