Women’s Football League: Jop ka Madanryting, Laitkor, RUFC & Lumparing

Haba phai sha ka jingïalehkai kaba khatduh, ka Lumparing SC ka la pynliem noh ïa ka New Challengers da 4-0 kol.

Shillong, Nohprah 16

Ka lympung ïalehkai Women’s Football League 2024 ba la pynïaid da ka Shillong Sports Association ka la nangjam shaphrang ha kaba ka Madanryting SC, Laitkor SC, Rangdajied United FC bad ka Lumparing SC ki la ïoh jingjop ha ka Lah Sngi U Blei.

Ha kane ka jingïakhun kaba la long ha ka SSA Stadium kaba ha First Ground, Polo, ka Madanryting SC ka la pynliem noh ïa ka Mawpat SC da 5-1 kol. Ka Phibajanai Nongsteng ka la thep ar kol ha ka minit kaba 25 & 44, katba ïa kiwei pat la pynbud da ka Shemery Rynjah (20), Marine Kharkongor (17) bad ka Maidenly Nongbri (59). Na ka liang ka Mawpat ka la pynphai kylla shi kol lyngba ka Dahunshisha Syiemlieh (63) hashwa ba kan mad ïa ka jingshah rem.

Ha ka jingïakhun kaba ar ka Laitkor SC kala jop da 5-0 kol ïa ka Kharang SC. Ka Ribahunkhkhem Kharshing ka la thep marwei ar kol ha ka minitk kaba 29 & 30, katba ïa kiwei pat la thep da ka Sanfida Nongrum (24), Ïaraplang Nongrum (32) bad ka Tracy Rympei (38).

Ka Rangdajied United ka la pynjemkhnap haduh shiteng dorjon (6-0 kol) ïa ka Nongrim Hills SC. Ka Inrila-I-Dor khongthaw (6 & 25) bad ka Eightfullness Shandiar (42 & 57) ki la thep mar ar kol, katba ïa ki shi kol la thep da ka Eiladki Ksoo (9) bad ka Ideibanri Kharpan (63).

Haba phai sha ka jingïalehkai kaba khatduh, ka Lumparing SC ka la pynliem noh ïa ka New Challengers da 4-0 kol. Ka Fragrancy Riwan ka la thep marwei ar kol ha ka minit kaba 27 & 32, katba ïa kiwei pat la thep da ka Marbarin Nongrum (5) bad ka Ïaphisha Marbaniang (16).