Shillong, Nohprah 17
U Symbud Myntri Rangbah ka Jylla ba khmih ïa ka tnat District Council Affairs (DCA), Bah Prestone Tynsong u la ong ba kito ki briew kiba kwah ban bujli ïa ka Khyrnit Hynriew (Sixth Schedule) ki dei ban ngam kham jylliew.
Haba kren ha ka jingïalang pyllait kot wad bniah ka KHADC, u Bah Prestone u la pynkynmaw ha ka por ba ka Sorkar India ka dang thmu ban pynlong aiñ ïa ka Citizenship Amendment Bill (CAB) ha kato ka por, kaba mynta ka la kylla long ka Citizenship Amendment Act (CAA).
U la ong ba baroh kawei ka Thaiñ Shatei Lam Mihngi ka la khluit bad thnam bad u Myntri Rangbah, Conrad K Sangma u la lum ïa ka kynhun ki Nongïalam ka thaiñ ha Guwahati, kiba la leit pat sha Delhi ban ïakhun pyrshah ïa kane ka aiñ.
Nalor kane, u la ong ba ha ka por ba u Amit Shah u ïakynduh ïa ka kynhun na Meghalaya ba kynthup ruh ïa ki sengbhalang bad ki seng saiñpyrthei, tang shi laiñ u Amit Shah u la jubab ba lada long aiñ ka CAB kan ym don jingktah ïa ka Meghalaya namar ba ka don ïa ka Khyrnit Hynriew.
“U (Shah) la ong phi namar ba phi don ïa ka Khyrnit Hynriew, ïa phi la pyllait noh na ka CAA”, la ïathuh u Bah Prestone.
U Symbud Myntri Rangbah u la ong ba hap ban pynkynmaw ïa kane ka bor jong ki district council namar ba don kiba ong ba kwah ban bujli noh ïa ka Khyrnit Hynriew, bad bynrap ba dei ki district council kiba ai ka jingïada ïa ka Jylla kaba don lai tylli ki jaidbynriew, ki Khasi, Jaiñtia bad Garo.
Haba kynthah tyngeh ïa kiba kwah ban wanrah ïa ka Article 371 ha ka jaka jong ka Khyrnit Hynriew, u Bah Prestone khlem da kynthoh ïa kita ki briew u la ong, “Mynta don kiba ong ba la dei ka por ban bujli noh, hana ba ka Khyrnit Hynriew kam long, ka Khyrnit Hynriew kam donkam”.
“Ngam kwah ban ïatai nia. Nga kwah ban khot ïa kita ki paralok kiba sngewthuh bakla ban ong tang kawei, sngewbha ngam kham shaba jylliew ba phin sngewthuh ïa ka dor bad ka bor jong ka Khyrnit Hynriew”, la ong shuh shuh u Bah Prestone.
