Shillong, Nohprah 18
Ka Pay For Right Football Academy ka la pynjem khnap haduh 10-0 kol ïa ka Madanryting SC ha ka lympung ïalehkai SSA Women’s Football League 2024, katba ka Lumparing SC ka la jop da 9-1 kol ïa ka Nongrim Hills SC.
Ha kane ka jingïakhun kaba la long ha ka Sngi Balang ha SSA Stadium, Polo, ki ‘thei ïalehkai ka PFR ki la lah ban pynpaw ïa ka jingtbit ha kaba ka Nisilia Majaw bad ka Ridalin Suting ki la ïoh hat-trick.
Ka Nisilia ka la thep marwei haduh saw kol ha ka minit kaba 25, 26, 30 & 42, katba ka Ridalin ka la thep ha ka minit ba 28, 33 & 35. Ïa kiwei pat la thep da ka Cynthia M. Umlong (56 & 59) bad ka Juba M Lyngdoh (69).
Ha kawei pat ka jingïakhun ba ar, ar ngut ki ‘thei ïalehkai ka Lumparing, ka Fragrancy Roiwan (2,6 & 48) bad ka Ïaphisha Marbaniang (8, 55 & 70) ki la khur ïa ka hat-trick, katba kiwei pat ki kol la thep da ka Marbarin Nongrum (4 & 35) bad ka Sidaris Khongwet (29).
Haba phai sha ka jingïakhun kaba khatduh ka New Challenges ka la shah rem noh ha ka Smit SC da 0-2 kol. Ïa kine kol la thep da ka Nishalin Nongrum ha ka minit kaba 21 bad ka Makrisha Songthiang (62).
