Badapjied Kurkalang
Bynta 1#
Da ka mynsiem kaba sngewkhia ngam lah khlem da thoh bad pashat jingmut lem sha phi ha kaba ïadei bad kane ka bynta kaba nga shem ba ka long kawei na ki daw kaba la pyndkoh bad pyntlot ïa ngi kum ka jaidbynriew. Hooid, nga hap ban pyntip nyngkong duh ba kane ka khubor ka dei kyrpang na ka bynta ki riewngiet Khristan kiba don ha kane ka ri bad jaidbynriew jong ngi.
Kaei kaba nga thoh hangne ka lah ban long kaba phylla lane kaba pynkhuslai jingmut lane kaba pynpyrkhat ïa phi kiba pule. Ka daw kaba nga thoh ka long ba ngam shym la thoh ban pynsngewbha ïano ïano hynrei nga thoh beit katba kum ka jingshisha lyngba ki jingpule bad jingwad jong nga. Hynrei ka dei ka kamram jong phi pat kiba pule ban puson bad pyrkhat, kano kaba shongnia bad shong nongrim ha kaba kut ban shim ïa ka rai.
Hooid, ngam lah ban thoh lut ha kane ka artikl ïa ka jingshisha bad ki sakhi satar ha kaba ïadei bad ka jingshem bad ka jingwad jong nga ha kane ka bynta. Tangba ïa kiba kwah ban tip bad wad kham bniah, phi lah ban pynïoh ïa ka kot kaba la pynkylla na ki jingthoh jong ki nongthoh histori bapher bapher kiba kren bad ai jingshai halor kane ka bynta. Nga ngeit lada phi pynïoh ïa ka kot ka ban dang mih kan pynkylla ïa ka rukom pyrkhat jong phi kumba ka la pynkylla ïa ka rukom pyrkhat jong nga.
Nga ngeit ba baroh ngi la ïa heh ïa san bad ïohsngew ïa ki khubor shaphang ka jingwai noh ka pyrthei (end of the world) ne ka jingrongnoh (rapture) kaba ong kumne, mynta ngi im ha kita ki sngi kiba khatduh bad ka jingrongnoh ka la hajan eh. Ngi la im ryngkat bad kane ka rukom pyrkhat naduh dang rit haduh ba ngin da heh. Kam pher phi wan na kano-kano ka Balang bad ki Balang ki lah ban don ka jingïapher ha kiba bun ki bynta ha ki jinghikai jong ki, hynrei ha kaba ïadei bad ki khubor jong ka sngi kaba khatduh (eschatology) kam don satia kano-kano ka jingïapher. Baroh ki don ïa ka juh ka rukom peit bad pyrkhat ha kaba ïadei bad kita ki sngi kiba khatduh (eschatology).
Ngi ju ïohsngew ruh na ki nongkren jong ki Balang bad riewshimet kiba kren shaphang kita ki sngi kiba khatduh bad ka jingrongnoh, kiba ong, ba ha shuwa ka jingwan U Jisu kan don kata ka jingpynshitom kaba khraw ha kane ka pyrthei (Great Tribulation) hynrei kane ka jingpynshitom kan ym hap halor ki riewngeit Khristan kiba shisha namar U Blei un wan ban rongnoh (rapture) ïa ki. Ki ban shah pynshitom kin long tang kito ki bymngeit bad ha kaba khatduh U Blei un wan ban pynjot shisyndon ïa kane ka pyrthei baroh da ka ding. Nga ngeit baroh ngi la long mlien ban ïohsngew ïa kum kine ki khubor na ka por sha ka por.
Lada phi long ki Khristan kiba pyrkhat, kaba phi dei ban long, phin da sngew phylla ban ïohsngew ïa ki jingkren jong ki nongsharai Balang bad ki riewshimet kiba ïalap namar kaei kaba ki ïalap ka long pyrshah ïa kaei kaba ki kren. Lada phi sngap bha ïa ka jingkren ne jingïalap jong ki, ki ong kumne, to ngin duwai na ka bynta ka ri bad ka jaidbynriew ba U Blei un isynei ban pynim, pynbha bad thaw thymmai ïa ngi kum ka jaidbynriew. Hynrei, ha kawei pat ka liang ki ong kumne, mynta ngi im ha ki sngi kiba khatduh bad ka jingwan U Jisu ka la jan bad ngi dei ban pynkhreh na ka bynta ka jingrongnoh bad kaei ka ban bud ka long ka jingbishar U Blei bad ka jingpynjot ïa ka pyrthei baroh kawei da ka ding.
Hynrei kane ka dei ban pynlong ïa ngi ban kylli, lada U Blei un wan ban pynjot ïa ka pyrthei baroh kawei da ka ding, kumba ki ong, te balei duwai bad khmihlynti ïa ka jingpynbha, ka jingpynkhie im bad jingpynthymmai ïa ka ri bad ka jaidbynriew ? Ngi hap ban jied tang kawei na kane, la ka dei ba U Blei un pynbha lane pynjot ïa ka pyrthei. Ngim lah ban ong ba baroh ar tylli ki jingmut ki long kiba dei. Bad kaei kaba mih nangne ka paw bad ka pynlong ruh ïa ngi ban kylli, hato U Blei jong ngi U long U Blei uba kylla khlieh-khlieh kylla tdong-tdong?
Lada U Blei un wan ban pynjot ïa ka pyrthei baroh kawei, hato kan myntoi aiu ïa ngi ban pyrshang ban wanrah ïa ka jingkylla ha ka ri bad ka jaidbynriew jong ngi? Ka mut ki jingpyrshang jong ngi baroh ki long tang kaba shuh leh tynneng bad ha kaba kut kam don satia kano kano ka jingthmu. Hato kumno ngi long kiba ïapher na kiwei pat ki jaid niam bad jingngeit kiba don ha kane ka pyrthei? Ym don kano kano ka jingïapher, lait noh tang ha ka bynta jong ka jingpynim.
U Blei U hikai ïa ngi ban duwai kumne, “to wan ka Hima jong me ha khyndew kumba ha bneng.” Hangne U Jisu ym shym la hikai ïa ngi ban khmih lynti ba ka hima jong U kan long ha bneng, hynrei ka hima jong U kan long ha kane ka khyndew. Ngi duwai ïa kane ka jingduwai da ki hajar sien tangba balei ngim iohi satia ïa ka hima jong U ha kane ka pyrthei ? Kaei ka daw? Ka daw ka dei namar ngim ju iohsngew ïa ka khubor kaba pura shaphang ka Hima U Blei bad kaei kaba ngi iohsngew ka long tang ka khubor jingpynim. Ka khubor shaphang ka Hima U Blei ka la jah na ka Balang da ki spah snem mynta bad ainguh ïa U Blei ba ngi lah ban ioh biang ïa kane ka khubor ha kine ki por jong ngi kiba mynta. Phi donkam ban ioh ïa kane ka jingpynpaw namar lada phim ioh ïa kane ka jingpynpaw phin ym tip ïa ka jingthmu kaba U Blei u buh ïa phi ha kane ka pyrthei, namar ka jingthmu U Blei ïa ngi kam kut tang ban ioh jingpynim.
Namarkata kaei kaba ngi pyrkhat ha kaba ïadei bad ka lawei jong ka pyrthei ka ktah ruh ïa ka rukom pyrkhat jong ngi kumno ngi im ka jingim kaba man ka sngi. Ka pynlong ruh ïa ngi ban pyrkhat tang ïa kaba mynta bad ngim lah keiñ ban pyrkhat jngai ïa kiei kiei baroh namar ka pyrthei ka la jan wai. Ka long ka jingshisha, kumno ngi peit ne pyrkhat ïa ka lawei jong ka pyrthei ne ïa ka ri bad ka jaidbynriew kan ktah ban pynkylla ïa ka jingmut jingpyrkhat jong ngi. Lada kaei kaba ngi tei bad leh kan neh haduh ka jingwan kaba khatduh U Jisu nga ngeit ba ka jingpyrshang jong ngi ka don jingmut kein. Lada kam long kumta, ngin ym sngew lyngngoh balei ba ka ri bad ka jaidbynriew jong ngi ka hiar haduh katne katne. Ka Proverb ruh ka pynkynmaw ïa ngi, kumba u briew u pyrkhat kumta ka pyrthei jong u ruh kan long.
Tang ban shu pynkhih ïa ka jingmut jingpyrkhat jong phi. Kumno lada nga ong ïa phi ba kaei kaei baroh kaba phi leh ha kane ka pyrthei kan iai sah junom? Ne kumno lada phi tip ba U Blei yn ym pynjot ïa kane ka pyrthei bad kumjuh ruh ïa kane ka ri Khasi jong ngi ? Nga ngeit lada ka long kumta, ka rukom peit jong phi ïa kane ka pyrthei bad kaei kaba phi leh ban wanrah ïa ka jingkylla ha ka ri bad ka jaidbynriew kan long kaba pher ban ïa kaei kaba phi juh pyrkhat baroh shi katta. Kane kan pynkylla ïa ka rukom pyrkhat kumno ngi peit ïa ka mariang bad sdang ban sumar ïa ka kumba U Blei U kwah ïa ngi ban sumar. Bad kane kan pynkylla kumno ngi peit bad leh halor ka synshar khaddar, ka ioh ka kot, ka pule puthi, ka ioh kam ioh jam, ka khuid ka suba bad kiwei kiwei de, kiba don ha ka imlang sahlang. Ka pyrthei jong phi kan long kaba pher na kaei kaba phi juh pyrkhat.
Wat kyrkieh ban ong ia nga ba nga long la uba lamwir ban kren kumne namar kaei kaba nga shem kam long kaei kaei kaba shu wan jia kynsan kynsan ha nga mynnin ne mynta ka sngi, hynrei ka dei ka jingkylli kaba nga la kylli bad puson da ki bun bun snem mynta.
Tangba, ban poi sha kane ka thong ngi dei ban sngewthuh shuwa ïa ki soh kiba mih na ki jinghikai shaphang ki sngi kiba khatduh bad ka jingrongnoh kaba ngi la ioh jinghikai baroh shi katta. Nga lah ban ong ba ki soh kiba mih na ki jinghikai shaphang ki sngi kiba khatduh bad ka jingrongnoh ki long, kiba pyrshah bad kiba khanglad ban pyndep ïa ka hima U Blei ha kane ka pyrthei. Ngin dang ïai bteng ban kren shuh shuh halor kane, ha ka bynta kaba ar.
