Shillong, Nohprah 18
Ka Dr. A.P.J. Abdul Kalam Centre for Policy Research and Analysis, IIM Shillong ka la plie ïa ka Management Development Program (MDP) kaba la pynwandur na bynta ki ophisar Sorkar (Mid-Level) ka Arunachal Pradesh kaba la long naduh ka 16 tarik bad kut haduh ka 20 tarik u Nohprah, 2024.
Kane ka prokram ka thmu ban pynbiang ïa 30 ngut ki ophisar, kiba la don palat 10 snem ha ka jingshakri, da ki sap ki phong bad ki jingsngewthuh kiba donkam ban kyntiew ïa ka jingsynshar bad ka jingshakri paidbah. Ïa ka jingïalang plie la sdang da ka jingkren pdiang burom na u Dr. Sanjeev Ningombam, Centre Head ka Dr. A.P.J. Abdul Kalam Centre for Policy Research and Analysis. U Dr. Ningombam u la batai ïa ka rukom hikai jong ka prokram kaba la pynwandur ha ka rukom kaba bniah, da kaba pynleit jingmut ha ki jingkhmih lynti bad ki jingmih jong ka da kaba ban jur ïa ka jingdonkam ha ka ban pynroi ïa ka buit thymmai, ka jingtreikam kaba paka, bad ka jingpynbha ïa ki rukom pynïaid ha ka synshar-khaddar.
U Prof. D.P. Goyal, Director ka IIM Shillong, u la ai ïa ka jingkren sdang, ha kaba u la pynpaw ïa ka bynta ba kongsan jong ki ophisar ban pyntyllun ïa ka jingsynshar kaba bha ha Arunachal Pradesh.
U la ban jur halor ka jingdonkam jong ki nongïashim bynta ban kynthup ïa ki nongrim jong ka jinglong hok, ka sienjam, bad ka rukom treikam kaba pynshong nongrim ïa ki briew ha ka kam jong ki.
U Prof. Goyal u la pynshlur ruh ïa ki ophisar ban pdiang ïa ka jingkylla, ban pynïadei bad ki jingkylla ha ka rukom synshar, bad ban pynleit jingmut ha ka jingpule kaba bteng ban kyntiew ïa ki jinglah shimet bad ka jingtreikam jong ka kynhun.
Ha kine san sngi, ka prokram kan pynleit jingmut ha ki phang kiba donkam na ka bynta ka jingsynshar ka juk ba mynta, ba kynthup ïa ka jinglong nongïalam bad ka jingtei ïa ki kynhun, ka jingpynïaid ïa ki projek, ka teknoloji bad ka jingkylla ha ka rynsan ‘Digital’ ha ka jingsynshar, bad ka jingpynïaid ïa ka pisa tyngka.
Ha kajuh ka por, yn pynleit jingmut kyrpang ha ka ban pyndonkam ïa ki tiar ‘digital’ ha ka jingsynshar, kum ki rynsan ‘e-governance’, ka jingthmu ba la pynshong nongrim ha ka GIS, bad ka jingshim rai ba la pynshong nongrim ha ki jingtip ba ïoh lum, kumjuh ban shimkhia ïa ki mat ba kongsan jong ka ‘Cyber Security’ bad ‘Data Privacy’ ha ki tnad treikam ka Sorkar.
Kane kan kynthup ruh ïa ki ‘Workshop’, ki jingïakren, bad ka jingïasam jingtip ba la ïalam da ki ‘riew shemphang, kaba tyrwa ïa ki nongïashim bynta ïa ki buit treikam bad ki jingtip kiba lah ban pyntreikam ban weng ïa ki jingeh ha ka synshar paidbah.
Kane ka jingthmu ka pynpaw ïa ka jingangnud jong ka IIM Shillong ban kyntiew ïa ka jingpynroi ha ka ‘Capacity Building’ hapdeng ki heh Sorkar, ban pyntikna ba ki long kiba la khreh ban ïakhun ïa ki jingeh jong ka jingsynshar ka juk mynta bad ban noh synñiang sha ka jingkylla kaba ktah. Lyngba ka Dr. A.P.J. Abdul Kalam Centre for Policy Research and Analysis, ka IIM Shillong ka ïai bteng ban don ka bynta kaba kongsan ha kaba pynkhlaiñ ïa ka jinglong nongïalam, ka jingïasaid halor ki mat treikam, bad ka roi ka par kaba neh ha ka Thaiñ Shatei Lam Mihngi ka ri India.
