Shillong, Nohprah 18
Ka Mawdngong SC ka la lah ban pynthikna ban jam sha ka final ha ka Second Division Football Tourna-ment 2024 ba la pynïaid da ka Tyrsad Area Sports Association, hadien ba ka la lah ban pynliem noh ïa ka Mawliehpoh SC da 2-0 kol ha ka Sngi Balang.
Ïa kine ki kol la thep da u Sunilstar Kharshiing ha ka minit kaba 29 bad u Donal Rani ha ka minit ba 50.
Haba phai sha ka jingïakhun jong ka Third Division, ka Nongthymmai Neng SC ka la jop da 4-1 kol ïa ka Mawtyngngor SC. Ïa ki kol na ka Nongthymmai Neng la thep da u Stambok Kurbah (30 & 60), Khamborstar Nongbet (40) bad u King khyriem (65) bad na ka Mawtyngngor pat la thep da u Sam Nongsiej (63).
Haba phai sha kawei pat ka jingïakhun, ka Lawkhla SC ka la jop da 4-3 kol ïa ka Phanniewlah Neng SC.
Ha kawei pat ka jingïakhun semi final ba ar jong ka Second Division kan long ha ka 21 tarik hapdeng ka Mawkynroh SC pyrshah ïa ka Phanniewlahrum SC ha ka por 12 baje mynsngi, katba ka semi final jong ka First Division kan long hapdeng ka Mawponghong SC ïa ka Wahlyngkien Sunei SC ha ka por 2 baje nohphai sngi.
