Amlarem, Nohprah 18
Ka Sohkha Shnong bad Hynriam YC ki la buh jaka ïalade sha ka quarter final ha ka lympung ïalehkai Lower Division Football Tournament ba la pynïaid da ka Amlarem Sub Divisional Sports Association (ASDSA) hadien ba ki la ïoh jingjop ha ka Sngi Balang.
Ha ka jingïakhun pre-quarter final kaba la long ha Mini Stadium Ladjaplem, Amlarem, ka Sohkha Shnong ka la pynliem noh ïa ka Nongbareh Lyntiar da 2-0 kol. Wat la ka jingïakhun ka la long kaba itynnad bad kaba ïakhaid, hynrei ka Sohkha Shnong ka la ïoh ban thep ar kol lyngba u Bestmeyou Tariang ha ka minit kaba 25 bad kawei pat lyngba u Luminous Tongper ha ka minit ba 55.
Haba phai sha kawei pat ka jingïakhun kaba bud, ka Hynriam YC ka la pynliem noh ïa ka Satpator SC lyngba ka shi kol ba la thep da u Treyo Kassar ha ka minit kaba 9.
Haba phai sha ka jingïalehkai jong ka Super League hapdeng ka Umladkhur SC bad ka Lumpyngngad SC ki la kut ha ka jingïakhaid mar 1-1 kol. Tang mar ïasdang ka jingïalehkai ka Umladkhur ka la ïoh ban pynkhih jar nyngkong eh lyngba u Augustine Buam ha ka minit kaba 9, hynrei ka Lumpyngngad ka la lah ban pynphai kylla ha ka kylla miet lyngba u Ngiatbit Amrynsong ha ka minit kaba 53.
Ha kawei pat ka jingïalehkai ka Amlarem Social ka la jop da 2-0 kol ïa ka Jarian CSC. Ïa kine kol la thep da u Iaid Jungai ha ka minit kaba 47 bad u Tip Rasmut ha ka minit ba 63.
