Shillong, Nohprah 19
Ka Liang Pyrshah, Indian National Congress ka la pynbna ïa ka thup kyrteng kaba nyngkong jong 15 ngut kyrtong ban ïakhun ïa ka ilekshon sha ka KHADC.
Kane ka seng ha ka Sngi Palei ka 19 tarik Nohprah, 2024 ka la pynbna ïa ka thup kyrteng jong kyrtong ban ïakhun ha ka ilekshon sha ka Ïingdorbar Khasi Hills Autonomous District Council bad Jaiñtia Hills Autonomous District Council ka ban thep ‘vote’ ha ka 21 tarik Rymphang, 2025.
Ïa ka thup kyrteng jong ki kyrtong la pynbna da u President ka Meghalaya Pradesh Congress Committee u Bah Vincent H Pala ha Congress Bhavan ha ka Sngi Palei.
U Bah Pala u la ong ba ki dang don shuh ki konstitwensi kiba ka Election Committee kan sdang khmih bniah bad yn sa pynbna kham hadien ïa ki kyrtong.
Ha KHADC, napdeng ki 15 ngut ki kyrtong kiba la paw kyrteng bad kham pawkhmat ki long u Chief Executive Member (CEM) barim bad Chairman barim ka KHADC, Bah Pynshngaiñlang N Syiem uba dei ruh MDC ba mynta ka Mawkhar-Pynthorumkhrah konstitwensi. Ki 14 ngut kiwei pat ki dei kiba dang thymmai kiba kynthup ïa u Bah Manuel Badwar na Laitumkhrah konstitwensi bad u Bah Nathaniel Rymmai na Sohïong konstitwensi uba dei ruh u khun trai jong u Myntri barim ka Jylla uba la khlad noh, Bah HDR Lyngdoh.
Haba phai sha 11 ngut ki kyrtong kiba kham paw ha JHADC, ki long u CEM barim ka JHADC u Bah Madonbai Rymbai katba kiwei pat ki dei kiba la ïakhun ilekshon teng bad kiba sdang thymmai.
