Shillong, Nohprah 19
Ki ar kol ba la thep da u Donlad Diengdoh ki la biang pura ïa ka kynhun ïalehkai ka Jylla ban pynliem noh ïa ka Delhi ha ka Senior Men’s National Football Championship na ka bynta ka Santosh Trophy 2024-25 ha ka sngi Palei ha Hyderabad.
Kane ka long ka jingjop kaba nyngkong ïa ka Meghalaya ban khur ïa ki lai point ha ka Group-B hadien ba ka la shah rem ha ka Kerala (1-0) bad ïakhaid mar 2-2 kol pyrshah ïa ka Tamil Nadu ha ki jingïakhun ba la lah.
Utei u rangïalehkai shakhmat ka Jylla u la lah ban thep ïa kitei ki kol ha ka kylla miet kata ha ka minit kaba 49 & 51. Ha kajuh ka por ka long ruh ka jingkhanglad ïa ka Delhi ban ïoh rung sha ka quarter final namar kane ka kynhun ka la jop ar sien ha ki ar tylli ki jingïakhun ba la lah jong kane ka wat kaba khatduh.
U coach ka Meghalaya, Bah Hering Shangpliang, u la kylliang ïa uwei u rangïalehkai hadien ba u Fullmoon Mukhim u la mynsaw bad la bujli noh da u Kevin Rymbai naduh kaba sdang ka jingïalehkai bad u vice captain ka kynhun u Damanbhalang Chyne u la shimti kum u kapten.
Wat la kine ki kynhun kim shym la lah thep kol ha ka kylla step, hynrei u Donlad u la lah ban pynurlong ha ka kylla miet da kaba thep ar kol. Ka kol kaba nyngkong ka la wan hadien ba u Damanbhalang u la pyllait ïa ka kol na jngai ha kaba u nong-apkol jong ka Delhi u Raj Mahato u la pyrshang ban khanglad, hynrei ka bol ka la poi sha u Donlad, uba khlem pynlehnohei ïa kane ka kabu ksiar.
Nangta, shwa ba ka Delhi kan ïakhun tyngeh lyngba u Mahato, hynrei ka jingstet u Donlad ka la pynlong ïa u ban thep biang ïa ka kol kaba ar.
Hadien kane ka Delhi ka la ïoh ar tylli ki kabu kiba biang ban thep kol hynrei u rangapkol ka Meghalaya u Siwel Rymbai u la lah ban pyllait na ka jingshah thep. Kane ka dei ka sien nyngkong ba ka Delhi kam shym la lah ban thep kol bad ka dei ka sien kaba nyngkong ba kan shah thep kol ha Hyderabad.
Kumba ka long mynta saw tylli ki kynhun ki ban wan ha ki kyrdan basaw ha ka baroh ar tylli ki group kin ïoh rung sha ka Quarter Final. Te kumta ka Meghalaya ka dangdon jingkyrmen ban ïoh rung namar da kane ka jingjop ka la kamai 4 point. Ka Kerala ka dei ka kynhun kaba ka lamkhmat ha kane ka group da kaba kamai 9 point hadien ba ka la pynliem ïa ka Odisha da 2-0 kol mynta ka sngi. Ka Delhi kaba la wan ba-ar ka dangsah 6 point, katba ka Odisha mynta ka la wan hadien ïa ka Meghalaya da kaba kamai 3 point. Kiba bud hadien ki long ka Tamil Nadu (1) bad ka Goa (0).
Te kumta ka Meghalaya kan donkam ban khur ïa ki lai point pyrshah ïa ka Goa ha ka jingïakhun ka ban long ha ka Sngi U Blei ha ka por 2:30 nohphai sngi.
