Shillong, Nohprah 19
Ka tnat Kam Pohïing (Police) ka Sorkar Jylla ha ka sngi Palei ka la pynkynriah kam ïa ki ophisar IPS bad MPS ha kaba ka la wanrah ïa u Bah Vivek Syiem, IPS, kum u Superintendent of Police (SP) bathymmai jong ka East Khasi Hills District, Shillong.
Shuh shuh ha kane ka hukum pynkiew kyrdan ïa ki ophisar IPS bad MPS ka Jylla, la wanrah ïa u Bah Goldenbert D Kharwanlang kum u Superintendent of Police ka Anti-Terror Squad, Shillong bad pynneh ïa u Jagpal Singh Dhanao kum u Superintendent of Police ka ANTF, Shillong.
U Bah Banraplang Jyrwa, MPS, uba bat kum u Additional SP ka Ri-Bhoi, u la shah pynkiew kyrdan kum u Superintendent of Police ka South West Khasi Hills, Mawkyrwat ha ka jaka jong u Bah Goldenbert D Kharwanlang.
U Bah Dangsan Khyriem, MPS, uba bat kum u Additional SP ka CBPS, Eastern Range, u la shah pynkiew kyrdan kum u Superintendent of Police ka Eastern West Khasi Hills, Mairang ha ka jaka u Bah Maxwell B Syiem, IPS, u ban leit shimti mynta ïa ka kam SP ka Infiltration Directorate.
Katba u Bah Maxwell B Syiem, IPS (SPS 2017) uba dei u Superintendent of Police, Eastern West Khasi Hills District, Mairang u la shah pynkynriah kam bad shah thung kum u Superintendent of Police, Anti-Infiltration Directorate, Shillong.
