Jowai, Nohprah 19
Ka shnong Moolamylliang ha East Jaiñtia Hills ha ka 18 tarik Nohprah ka la ïoh ban plie biang ïa ki jingpynthaba Khristmas kiba pynshoh biej ha ka sien kaba hynriew kaba thmu ban khring shuh shuh ïa ki nongwan shangkai na kylleng ban wan ban sakhi da lade ïa kane ka jingpynriam pynbeit kaba kham i phylla nalor ka jingwan ïashim bynta jong ki kynhun nongtem nongrwai ba pawkhmat.
Ha kane ka sngi la ïadon lang ruh ka Kong Santa Mary Shylla, MLA ka thaiñ kum ka kongsan bad u Deputy Commissioner ka East Jaiñtia Hills District u Shivansh Awasthi kum u symbud kongsan nalor kiwei pat ki riew pawkhmat.
Ïa kane ka sienjam jong ka jingpynriam pynbeit kaba khring ïa kiba bun bah ki nongwan shangkai na kylleng ha kine ki sngi shuti Khristmas la pynlong nyngkong ha u snem 2019 kaba long shibynta ban kyntiew ïa ka kam jngohkai.
Naduh kine ki khyndiat snem ba la dep, ka shnong Moolamylliang ka la kylla long ruh ka shnong kaba pawkhmat ha ka liang ka kam jngohkai, ka jingkhuid jingsuba, ka jingitynnad jong ka mariang bad khamtam halor kine ki jingpynriam Khristmas kiba pynthaba ïa ka shnong ka thaw baroh kawei.
Mynta u snem, ïa kine ki jingpynthaba yn lah ban sakhi man la ka janmiet naduh ka 18 tarik Nohprah haduh ka 3 tarik u Kyllalyngkot 2025.
La pynkhreh ïa ki jingpynbyrngia ba bunjait na ka bynta ki nongwan shangkai kiba ha baroh ki rta.
Ka Dorbar Shnong kan pynlong ruh da ka ‘Musical Night’ ha ka 24 tarik Nohprah ka ban wan ïashim bynta da ka kynhun tem ba pawkhmat na Jowai ka “Magnificent Obsession” nalor ka ‘Gospel Concert’ ha ka 25 tarik Nohprah 2024 ka ban sdang naduh ka por 6 baje janmiet nalor ka jingïashim bynta da u DJ Wanshan bad Eladmitre Dkhar.
