Shillong, Nohprah 19
Ka jingjia shah jrong kti jong ki khynnah samla kynthei kiba dei ki samla Khasi ha uwei u bar jylla uba dei u trai jong kawei ka dukan die tiar ha Khyndailad dang ha kine khyndiat sngi ba la dep. Ka la mih ka jingkynnoh na kitei ki samla kynthei ba utei u bar jylla u la jrong kti ïa ki na ki jaka ki bym dei bad ktah ha ka met jong ki. Kumta halor kane ka jingjia, na ka liang jong kine ki samla kynthei ki la leit ban pan jingïarap na ka Hynñiewtrep Integrated Territorial Organisation (HITO) Shillong City ba kan tuklar lem halor kane ka jingshah jrong kti jong ki.
Kum ban shu kdew hangne, uwei u bar jylla uba la kham rangbah bad ïa uba la tip kyrteng kum u Anand Agarwal uba dei u trai jong kawei ka dukan kaba don ha Khyndailad ïa kaba la tip kum ka Roshni, kaba dei ka dukan die tiar ilektrik bad tiar Khrismas, u la shah kynnoh ha kitei ki nongtrei Khasi ba u la jrong kti bad ong ba kane ka jingjrong kti jong utei u bar jylla kam dei satia ha ka sien kaba nyngkong hynrei kum kine ki jingleh jong u ki dei ki jingjia kiba na ka por sha ka por.
Kumta, na ka liang ka seng hapoh ka jingïalam jong u President ka HITO Shillong City, u samla Banpyntngen Syiemlieh, ki la shimti ha ka ban tohkit bad wad jingtip na une u bar jylla halor ka jingkynnoh kaba la bynrap da kine ki khynnah samla bad ha ka 19 tarik u Nohprah, 2024, ka seng ka la leit ban ïakynduh ïa ka Chairperson jong ka Meghalaya State Commission for Women (MSCW) na ka bynta ban ujor halor kane ka jingleh khlemakor jong ki bar jylla pyrshah ïa ki kynthei Khasi kiba trei bad ki.
“Na ka liang ka Commission ruh ki la long kiba la pynkhreh ban leh ïa kaba ki dei ban leh lada dei ban ai ïa ka jingpynsaja ne kino-kino kiba ki dei ban shim ïa ka rai. Ngi khmih lynti bad ngi kyrmen ruh ba kane ka Commission kan lah ban wanrah jingkylla na ka bynta kiba bun ki kynthei samla jong ngi”, ong u samla Banpyntngen.
Haba ïakren bad ki nongthoh khubor hadien ka jingwan ïakynduh bad ka Chairperson jong ka MSCW, u President ka HITO Shillong City, samla Banpyntngen, u la pyntip ba na ka liang ka Commission ruh ka la kular ban shimkhia halor kane ka bynta da kaba bishar bniah lada donkam ban ai ka jingpynsaja ïa uba donkti ban leh khlemakor ïa kitei ki samla kynthei Khasi.
Ha kajuh ka por, ka HITO ka la kyntu ruh ïa ki samla Khasi khamtam ïa ki kynthei ba kin wan shakhmat da kaba leit ban ud-ban nam sha ka Commission lane ki lah ban wan mih sha ka seng ruh lada ki ïakynduh ïa kino-kino ki jingjia shah thombor ne shah leh khlemakor na ka bynta ban ïoh ïa ki lad jingïarap.
