Shillong, Nohprah 20
Ka Hill State People’s Democratic Party (HSPDP) ka la ong ba ka thong jong ka seng ban leit sha u paidbah ha kane ka ilekshon MDC ban wan ka long halor ki lai tylli ki phang pyrkhat – ban pynneh-pynsah, ban ïada bad ban pynbha.
“Ban pynneh ïa ka matti jong ki ‘Volunteer’ kiba la ïakhun ban pynïoh ïa ka Jylla lajong, jong u Bah Hopingstone Lyngdoh, u nongseng ka HSPDP bad ki para nongïalam jong u, bad ïa ki matti jong ka mat treikam ka seng kaba la buh naduh ba sdang haduh mynta, ngi pynïaleh ilekshon halor kata ka nongrim,” ong u President ka HSPDP, Bah K.P. Pangniang haba kren sha ki lad pathai khubor ha ka jingïalang pynbna kyrtong ha ka Sngi Thohdieng.
Haba kdew ba ka seng kan leit sha u paidbah da ka jingskhem jingmut, u Bah Pangniang u la ong ba teng-teng watla la ïohi kumba ka seng ka tlot, hynrei kum ka seng ka la shakri bad ïai shakri naduh ba la ïoh ïa ka Jylla lajong haduh mynta bad kam pat kylla dien ne shet kylla ïa ka nongrim jong ka.
“Ka seng ka don ïa lai tylli ki phang pyrkhat kaba ka don ban pynsngew sha ki paidbah…ban pynneh-pynsah, ban ïada bad ban pynbha,” ong u President.
Halor ka jingpynneh-pynsah, u la ong ba ka jaidbynriew ka dei kaba ai jait kmie bad kumta u la ban jur ban pynneh ïa kane ka jinglong kyrpang jong ki longkmie bad ka seng kan ïeng skhem haba ïadei bad kane ka bynta.
“Ngi don ki Dorbar Shnong, Dorbar Hima, ka iktiar kaba u mynbarim u la ai ha ngi, ngim kwah ban pynkylla ïa kane hynrei ngin pynneh ïa kata ka hok synshar-khadar jong ngi,” u la ong.
Shuh shuh halor ka mat ba ïadei bad ka jingpynbha, u la bynrap, “Lehse kin don ki riti-dustur jong ngi, ngin nang pynbha shuh-shuh – ïa ki Dorbar Shnong, Riti Synshar Hima, Syiem, Daloi, Wahadadar, ki Lyngdoh, ngi lah ban pynbeit ryntih katkum ka jingdonkam.”
Na ka liang ka HSPDP ka kyrmen skhem ruh ba baroh ki kyrtong kiba ka seng ka pynïeng na bynta ka ilekshon MDC ban wan (KHADC & JHADC) kin poi sha ka thong.
