Khliehriat, Nohprah 20
Uwei u rangbah uba kyrteng u Bah Blanstar Kharsati, ba ju khot ieid, u Bah Lan (48 snem rta), uba shong ba sah ha Mawryng-kneng Pdeng Shnong, East Khasi Hills u la jah rngai na ka jaka kaba u leit trei bylla sha Wahïajer, Narpuh, East Jaiñtia Hills bad ym pat shym la lapdien shuh kat haduh mynta.
Na ka liang jong ka Kong Kyntilang Kharsati kaba shong ba sah ha Mawryngkneng bad kaba dei shipara bad u Bah Blanstar, ha ka 22 tarik Naiwieng ba la dep ka la leit ujor hapoh Lumshnong Police Station ha kaba ïadei bad kane ka jingjah rngai jong u kaba la jia naduh ka taïew ba-ar jong u Naiwieng ba la dep na ka jaka leit trei bylla ha Wahïajer, Narpuh.
Ka la pyntip ruh ba ki la pynlong ka jingwad hynrei kim shym la lapdien satia kat haduh mynta.
U Bah Blanstar uba dei u khun jong u (L) Bah Dwor Lawai, u dei u rangbah uba kham dum sniehdoh, pdeng briew ha ka met ka phad, ka rynïeng kumba 5.4 phut, kham pyllun dur bad mih khmut bad uba don ka sur kren kaba suki.
