Shillong, Nohprah 20
Ka Dorbar Shnong Lawmali Pyllun (DSLP) ka la ong ba ka jaka ba la pynïeng païa bad siang jar nar hajan CRPF Camp da ka ‘Smart City’ ka hap hapoh u pud u sam jong ka DSLP.
“Na ka liang ka DSLP, ngi kwah ban pynshai ha kaba ïadei bad ka khubor kaba la mih ha ‘U Nongsaiñ Hima’ ha ka sla 1 ha ka 14 tarik u Nohprah halor ka ‘heading’, ‘Khlem jingbit na ka Dorbar Shnong Golflink, la pynïeng païa ban siang jar nar hajan CRPF Camp’, ka Executive Committee jong ka Dorbar Shnong ha ka 16 tarik u Nohprah ka la ïakynduh kyrkieh ban ïatai halor ka jingmih katei ka khubor,” ong u Asst. General Secretary ka DSLP, Bah P. Nongneng ha ka kyrwoh.
U la ong ruh ba ka Dorbar Shnong ka kwah ban pynshai ba katei ka jaka ba la pynïeng païa bad siang jar nar hajan CRPF Camp da ka ‘Smart City’ ka hap hapoh u pud u sam jong ka DSLP.
“Ka Dorbar Shnong kam don kano-kano ka jingpyrshah halor katei ka jingtei da ka ‘Smart City’,” u la ong.
