Shillong, Nohprah 20
Ka Deputy Commi-ssioner ka East Khasi Hills, Kong R.M. Kurbah ka la khang pyrshah ïa ki kam khalai bad ka jinglum bai rung be-aiñ ha Lum Shyllong (Shillong Peak) ha ka sngi rakhe snem thymmai.
Ha ka hukum ba la pynmih ha ka Sngi Thohdieng, ka DC ka la ong ba la ïoh jingtip ba ka ju don ka jingïakhalai be-aiñ lem bad kiwei-kiwei ki kam be-aiñ ha Lum Shyllong (Shillong Peak) man la u snem ha ka sngi rakhe snem thymmai bad ka jinglum bai rung be-aiñ (Entry/ Parking) kaba ju lum na ki paidbah ha katei ka jaka man u snem ha kane ka sngi rakhe snem thymmai.
“Bad haba, lada shah ïa kum kine ki kam be-aiñ, ka lah ban ïalam sha ka jingshah pyndik jong ki paidbah bad ktah ruh ïa ka jinglong kyntang bad burom jong ka Raid bad Hima Mylliem baroh kawei bad haba, nga la hun pura ba ka hukum ban khang pyrshah hapoh ka kyndon 163 BNSS ka long kaba donkam ban mynjur,” la ong ka DC.
Kano-kano ka jingpynkheiñ ïa kane ka hukum yn pynngat ha ka kyndon aiñ 188 jong ka BNS, ka la bynrap.
