Nongstoiñ, Nohprah 20
Ha ka 20 tarik Nohprah, 2024 ki nongïalam ka Joint Action Committee (JAC) jong ki 3 tylli ‘Polling Station’ (Misei, Langdongdai bad Mawsmai) ha ka jingïalam u Chairman, Bah Jeremiia Dkhar ki la ïoh ban ïakynduh ïa u Chairman ka KHADC, Bah Lamphrang Blah bad ïa u Bah P.N. Syiem ha ka shlem treikam.
U Chairman ka JAC, Bah Jeremiia Dkhar u la pynpaw ka jingkmen hadien ba ka KHADC ka la mynjur ïa ka mat jingdawa jong ki paidbah ki 21 tylli ki shnong ban pynphai pat ïa ki na Rambrai-Jyrngam Constituency sha Mawshynrut Constituency.
“Ngi la ïoh eiei watla dang donkam ban ïaid lyngba ka DCA bad ban ïoh sa ka muhor u Lat ka Jylla halor kane ka jingdawa,” ong u Bah Jeremiia.
U la ong ba ka JAC ka ai khublei ïa u Bah Pynïaid Sing Syiem, CEM ka KHADC bad u Bah P.N. Syiem kum u Chairman ka Selection Committee ba ki la sngap ïa ka sur jingdawa ki 21tylli ki shnong.
Ka JAC lyngba u Chairman ka la kyrpad ïa u Bah Prestone Tynsong, Myntri ka tnad ba dei peit ban ïarap lem halor ka mat jingdawa jong ki 21 tylli ki shnong khnang ba kin lah ban thep ‘vote’ noh ha ka Mawshynrut Constituency ha ka ilekshon MDC ban wan kumba la long baroh shikata.
U la bynrap shuh-shuh ba ka JAC kan ïai buddien bad shen yn sa wad bad thaw lad ban ïoh ïakynduh ïa u Bah Prestone Tynsong ban pynurlong ïa kane ka mat jingdawa jong ki paidbah 21 tylli ki shnong.
