Shillong, Nohprah 20
Ka Meghalaya Board of School Education (MBoSE) ka la pynbna ba la pynkynriah noh ïa ka eksamin Secondary School Leaving Certi-ficate (SSLC) bad Higher Secondary School Leaving Certificate (HSSLC) tang ïa ki sobjek kiba ïatyngkhuh bad ka sngi thep ‘vote’ bad ka sngi ñiew ‘vote’ ha ka ilekshon sha ka Ïingdorbar Khasi Hills Autonomous District Council (KHADC) bad Jaiñtia Hills Autono-mous District Council (JHADC).
Ka sngi thep ‘vote’ ka dei ha ka 21 tarik Rymphang, 2025 bad ka sngi ñiew ‘vote’ ha ka 24 tarik Rymphang 2025.
Ka MBoSE ha ka jingpynbna kaba la pynmih ha ka Sngi Thohdieng ka la pynbeit thymmai ïa ki tarik ban thoh eksamin na ka bynta katto-katne tylli ki sobjek.
La ong ba ka eksamin SSLC ha ka sobjek Jingkheiñ kaba dei ban pynlong ha ka 21 tarik Rymphang 2025 la rah noh sha ka 25 tarik Rymphang, 2025.
Ïa ka eksamin HSSLC na ka bynta ka vocational subjects/poultry farming-IV/computer technique-IV kaba dei ban pynlong ha ka 21 tarik Rymphang 2025 la rah noh sha ka 19 tarik Lber, 2025.
Ka MBoSE ka la pyntip ruh ba ïa ka eksamin HSSLC na ka bynta ka sobjek Physics bad History kaba dei ban pynlong ha ka 24 tarik Rymphang, 2025 la pynkynriah noh sha ka 6 tarik Lber, 2025.
Shuh shuh, ka eksamin HSSLC na bynta ka sobjek Sociology kaba ïatyngkhuh bad ka sngi ñiew ‘vote’ ha ka 24 tarik Rymphang la rah sha ka 18 tarik Lber, 2025.
Ka jingpynkynriah ïa ka eksamin khamtam ha ka sngi thep ‘vote’ kan long ruh ka lad ïa ki samla ba kin ïoh ban leit thep ‘vote’ ha ka 21 tarik Rymphang, 2025 khamtam ki samla pule kiba la kynjoh 18 snem ka rta bad kiba la dep pynrung kyrteng ïalade kum ki nongthep ‘vote’.
Ha ka jingshisha, ka eksamin SSLC kan sdang naduh ka 10 tarik Rymphang bad la buh ba kan kut ha ka 21 tarik Rymphang, 2025, katba ka eksamin HSSLC kan sdang ha ka 18 tarik Rymphang, bad kan slem ban kut namar ka jingpud sngi ban pynlong ïa ka eksamin.
Ka jingpynlong ïa ka ilekshon ban jied thymmai ïa ki nongmihkhmat sha ka Ïingdorbar KHADC bad JHADC hap ban pyndep shwa ka 5 tarik Lber, 2025.
Ka Ïingdorbar KHADC bad JHADC ki hap ban ïoh ïa ki dkhot kiba thymmai ha ka 5 tarik Lber lane shwa ka 5 tarik Lber, 2025 namar ba ka samoi treikam jong ka KHADC bad JHADC kan kut noh ha ka 5 tarik Lber 2025.
