London, Nohprah:
Ka Britain, ha ka Sngi Palei ka la pynbna ia ka song jingïarap kaba haduh £163;225 million ($286 million) ban phah sha ka tnat ïada jong ka Ukraine na ka bynta u snem ban wan, kynthup ïa ki drone, ki lieng bad ki tiar ïada bad ki tiar ïakhun na suiñ.
Kane ka sienjam ka long hadien ba u Myntri kam pohïing ka UK, u John Healey, u la leit sha Ukraine ha ka Sngi Balang, ha kaba u la ïakren bad u paralok jong u na Ukraine- u Rustem Umerov bad u la kular ruh ban pynkhlaiñ ïa ka jingkyrshan jong ka Britain ïa ka Ukraine ha u snem 2025.
Namar la ong ba mynta la 3 snem naduh ba u President ka Russia- u Vladimir Putin, u la hukum ïa ki shipai ïada jong u ban leit hiar thma ïa ka Ukraine, ha kaba u la antad kumno-kumno ka Ukraine ka la khyllem tang da ki katto- katne bnai. Hynrei la ong ba ka jingkhlaiñ jong ka Ukraine ban ïada ïalade, ka la wanrah jingeh ïa ka Russia namar ka jingleit ai jingkyrshan jong ki ri ka West bad khamtam ka United States kaba la kyrshan ratbah ia ka Ukraine naduh kaba sdang jong ka thma.
Ha u Naitung, ka sorkar thymmai jong ka Labour, ka la kular ban phah jingïarap sha ka tnat shipai jong ka Ukraine haduh £163;3 billion shi snem naduh kane ka por haduh ki snem 2030-2031.
Kumta la ong ba kane ka song jingïarap ba thymmai kan kynthup ïa ka 163;92 million ki tiar ban pynkhlaiñ ïa ki shipai ïada duriaw jong ka Ukraine, kynthup ïa ki lieng rit, ki drone syntiat bad ki lieng kiba ïaid ha sla duriaw ki bym don nongtrei.
Sa £163;68 million yn pyndonkam na ka bynta ki tiar iada suin kynthup ia ki radar, bad 1,000 tylli ki tiar ialeh thma electronic kiba ïaleh pyrshah ïa ki drone ha ka jinglut kaba £163;39 million yn pynpoi sha ki shipai jong ka Ukraine.
U Healey u la ong ba ka UK kan kyntiew ruh ïa ka prokram ai jinghikai na ka bynta ki shipai Ukraine ba la pynïaid bad ki paralok ba kongsan ha ka khyndew ka shyiap jong ka Britain kaba la tip kum ka Operation Interflex, ha kaba 51,000 ngut ki shipai la shah hikai naduh ka shiteng jong u snem 2022.
U Umerov u la ai khublei ïa ka UK na ka bynta ka jingkyrshan jong ka bad u la ong ha ka jingpynbna ba ka jingpyndep pura ïa ka jingkular ban pynpoi ïa ki tiar siat, ka long kaba kongsan bha na ka bynta ki jingpyrshang ïada jong ngi.
U la bynrap ba kitei ki arngut ki la bishar bniah ïa ka jingmih na ka jingpyndonkam ïa ki namding Storm Shadow, khlem da ai ïa ki jingtip ba bniah.
U President jong kaUkraine, U Volodymyr Zelensky, u dei ban ïakynduh ïa u heh ka NATO, u Mark Rutte bad ïa ki nongïalam ba kongsan jong ka Europe, ha Brussels, ha ka por janmiet jong ka sngi thohdieng, na ka bynta ban thaw buit halor ka thma jong ka Russia, ha shwa ba u Donald Trump, un wanphai biang ïa ka bor synshar ha America.
