Mawkyrwat, Nohprah 22
Ki 3 tylli ki tnat treikam jong ka KSU, kata, ka KSU Balat Border Area Circle, ka KSU Lawbah Border Area Circle bad ka KSU Sawsymper Circle ha ryngkat ka jingïatreilang bad ka KSU South West Khasi Hills District, ha ka 20 tarik u Nohprah, 2024 ki la pynkut noh ïa ka ‘Signature Campaign’ kaba la ïaid mynta la 5 bnai kynthih ban dawa na ka Sorkar Jylla ba kan kyntiew kyrdan noh mardor ïa ka Mawsynram C&RD Block sha ka Civil Sub-Division.
Lyngba kane ka ‘Signature Campaign’ ba khatduh, ka KSU ka la pynbna paidbah syndon ba ka seng kan pynjur shuh-shuh ïa ki jingïakhih halor kane ka mat jingdawa, kaba ki paidbah jong kane ka thaiñ ki la don hok ban ïoh ïa ka Civil Sub-Division namar ba ka dei ruh (Mawsynram C&RD Block) ka Block ba la rim tam hapoh ka Jylla Meghalaya, kaba la seng naduh ka por jong ka Sorkar Assam ha u snem 1962, bad kaba la tam ruh haduh 10 snem ïa ka Jylla Meghalaya ha ka rta.
U samla Bonsen Snaitang, President KSU Balat Border Area Circle haba ai jingkren u la ong ba ka KSU ka la pynlong ïa ki jingïakhih jai-jai bapher-bapher ha kine ki san bnai, hynrei ka Sorkar Jylla pat ka sngap mynthi khlem patiaw, bad kumta u la maham da kaba tyngeh ba ka KSU shen kan sa pynlong da kiwei pat ki jingïakhih ba tyngeh kiba lah ruh ban ktah ïa ka shongsuk shongsaiñ, bad hangta ka Sorkar kan hap ban shim hi ïa ka jingkitkhlieh.
Kiwei pat kiba ai jingkren ki kynthup ïa u samla Puljohn Wanniang, Organising Secretary KSU South West Khasi Hills District, u samla Samborlang Shabong, President KSU Lawbah Border Area Circle.
