Agartala, Nohprah:
Ha ka sienjam kaba kongsan ban pynkhlaiñ ïa ka tnad rep, u Myntri ka tnad Agriculture & Farmers Welfare bad u Myntri ka tnad Food, Civil Supplies & Consumer Affairs u Sushanta Chowdhury u la plie ïa ka jingïalang thied kba na ka bynta une u snem ha Madhav Bari Inter-State Bus Terminus (ISBT) ha kine khyndiat sngi ba la leit.
Kane ka jingthmu ka long ban thied 21,000 Metric Ton (MT) u khaw ba la mang T.48 klur ha kylleng jong 51 tylli ki Paddy Procurement Centre (PPC) ha ka jylla baroh kawei.
Haba ai jingkren ha kane ka jingïalang, u Myntri ka tnad pule puthi u Ratan Lal Nath u la ban jur ïa ka jingshimkhia jong ka sorkar kaba khlem artatien na ka bynta ka bha ka miat jong ki nongrep.
“Naduh u snem 2018, palat 2.76 lak ngut ki nong-rep ha Tripura ki la ïoh 790 klur tyngka lyngba ka Minimum Support Price (MSP) ba la pynthikna da ka Centre. Katba ka dor ïew jong u khaw ka long T.19 shi kilo, ka tnad bam pat ka thied ha ka dor T.23 shi kilo ban pynthikna ïa ka jingsiew kaba hok”, la ong u Nath.
Haba pynpaw ïa ki jingkiew ha ki jingtei, u Nath u la batai bniah, “Ka sorkar ka la tei ïa ki ïew rep, ka la sam ïa ki tiar rep kiba mynta, bad ka la ai ïa ki Card jong ka koit ka khiah jong ka khyndew. La pyntreikam ruh ïa ka jingkhmih ïa ka khyndew, ki jaka buh jingbam ba khriat, bad ka jingai jingïarap ïa ka sboh. Kaba phylla ka long ba 3.72 lak ngut ki nongrep, na ka jingbun briew baroh kaba 42 lak ngut, ki la ïoh ram kaba kot sha ka 2,025 klur tyngka.”
U Nath u la pynbna shuh shuh ia ka jingïarap pisa kaba T.52 klur na ka bynta ki nongrep kiba la shah ktah ha ka jingshlei um kaba la pynjulor ha u bnai Nailar 2023.
U la kyntu ïa ki nongrep ban pyndonkam hok ïa ka jaka bad ban rep ïa ki jingthung kiba ai jingmih bun, da kaba kdew ba ka mang tyngka jong ka rep ka la kiew na ka 330 klur tyngka kaba la buh lypa, haduh T.539 klur mynta. “Shwa u snem 2018, ka jingïohnong jong ki nong-rep ka long T.6,580; mynta, ka la kiew sha ka T.13,580,” u la bynrap.
U Myntri Sushanta Chowdhury u la pynpaw biang ïa ka jingaiti jong ka sorkar ïa ki nongrep, da kaba ong, “Ngi burom ïa ki nongrep kum ki nongpynbiang bam. Mynta u snem, ngin thied 21,000 MT u khaw ha kylleng ki 51 tylli ki Centre. Wat hapdeng ki jingeh kiba mih na ka jingshlei um, ngi pynkiew ïa ka MSP sha ka T.23 shi kilo, kaba kiew na ka T.21.23 ha u snem ba la dep. Ka sorkar BJP ka la buh hakhmat eh ïa ka jingbha jingmiat jong ki nongrep, ym kum ka sorkar barim, kaba khlem lah ban ïoh ïa ka jingïarap na ka sorkar pdeng haduh 25 snem.”
U Chowdhury u la kdew ïa ki jingjop jong ka sorkar BJP, kynthup ïa ka jingthied ïa u khaw uba shongdor T.397 klur, uba la ai jingmyntoi ïa palat 1.07 lak ngut ki nongrep. U la ïaroh ruh ïa ka skhim PM-Kisan, kaba ai pisa T. 6 hajar shisnem sha ki nongrep.
“Lada ka ïoh ka kot jong ki nongrep ka hiar, ka ïoh ka kot jong ka ri baroh kawei kan shah ktah”, u la maham.
U Director jong ka tnad bam u Sumit Lodh u la batai ïa ki jingpynbeit ïa ki marbam na ka bynta ka jingleit thied marbam. “Naduh u bnai Nohprah 2018, ka sorkar ka la thied khaw ha baroh ar ki aïom Kharif bad Rabi.
Mynta u snem, yn pynlut T.48 klur ha kaba thied marbam, bad kane ka jingïakhih kan bteng haduh ka 8 tarik u Rymphang, 2024,” u la ong.
U Director ka tnad Agriculture u Saradindu Das u la kdew ba ïa u khaw Hybrid la rep ha ka jingheh kaba 28 hectare, ha kaba ki nongrep ki ïoh ïa ka Subsidy kaba T.9,000 shisnem.
Ha kane ka sngi la donlang u Chairman ka Jirania Panchayat Samiti u Pritam Debnath, u Vice-Chairman ka Ranirbazar Municipal Council u Prabir Kumar Das, bad ki riewpawkhmat. Ïa kane ka prokram la pynïaid da u Chairman ka Jirania Nagar Panchayat u Ratan Kumar Das.
