Mawkyrwat, Nohprah 22
Ka District Congress Committee South West Khasi Hills District ha kaba ïadei bad ka jingpynkhreh ïa ka ilekshon MDC jong u snem 2025, na ka 26 Langrin Konstitwensi ka la sei da u Bah Pherdonnam Rngaid, kum u kyrtong ban ïakhun ïa kane ka ilekshon ka ban long ha u bnai Rymphang 2025.
Katkum ka jingpynbna na u Bah Kynpham V Kharlyngdoh, President ka District Congress Committee (DCC) ha ka 21 tarik u Nohprah 2022 hapoh ophis treikam ka seng, u la ïathuh ba hadien ka jingïatai ba sani bha, da kawei ka sur ki la ïa rai ban pynïeng bad phah tang kawei ka kyrteng kata ïa ka kyrteng u samla Pherdonnam Rngaid na ka shnong Nongnah-Nongkdait, South West Khasi Hills District bad uba bat ruh kum u Manager jong ka Nangkiew Irat Sports Club.
U Bah Pherdonnam u dei uba la pyndep ïa ka class 12 ha ka jingpule bad u dei ruh u nongkyrshan ba hajan tam jong u Martin M Danggo, MLA barim ka Ranikor Konstitwensi.
Shuh shuh u Bah Kynpham V Kharlyngdoh u la ïathuh ruh ba ka jingphah ïa ka kyrteng jong u samla Pherdonnam Rngaid ka dei hadien ba ka Ranikor Congress Committee (RCC) ka la rai lyngba ka jingïalang.
Ha kaba ïadei pat bad ka Mawkyrwat konstitwensi, na ka liang ka Congress kala dep ban pynbna paidbah ïa u Bah Medal Sing Lyngdoh kum u kyrtong MDC ha kane ka ilekshon ka ban sa wan.
