Shillong, Nohprah 29
Ka Mawkynrew Sports Club ka la long ka lahduh ha ka 4th Mawkynrew Cup Football Tournament 2023-2024 hadien ba ka la lah ban pynliem noh ïa ka Wahlakhiat Football Club lyngba ka tie-breaker da 4-3 kol ha ka jingïakhun final kaba la long ha ka sngi Saitjaiñ ha shnong Jongksha.
Ïa kane ka lympung la pynïaid da ka Maw-kynrew Cup Committee ha kaba la wan shim bynta da ki kynhun ïalehkai na ka thaiñ Mawkynrew baroh kawei.
Ha katei ka jingïakhun final baroh ar ki kynhun ki la ïakhun tyngeh naduh kaba sdang ha kaba ki la ïathep mar shi kol bad kane ka jingïakhaid ka la neh haduh kaba kut ki 90 minit. Dei ha ka jingïashut tie-breaker ba ka Mawkynrew ka la tam da 4-3 kol na ka bynta ban khur syndon ïa ka jingjop.
Ha katei kajuh hi ka sngi ka la don ruh ka jingïakhun phainal ha ka liang ki kynthei ha kaba ka Kharang SC ka la lah ban pynliem noh ïa ka Pingwait SC da 1-0 kol na ka bynta ban khur ïa ka nam lahduh.
Ha katei ka sngi la ïadon lang u Bah Bantei -dor Lyngdoh, MLA ka Mawkynrew Constituency bad uba dei ruh u Presi-dent ka Shillong Sports Association ha ryngkat ki dkhot ka Mawkynrew Cup Committee. Hadien kane, utei u kongsan u la sam ïa ki khusnam sha kiwei ki kynhun.
Haba ai jingkren ha shwa ban sdang ka jingïa-khun final jong ki shynrang, na ka liang u Bah Banteidor ula pynbna paidbah ba shen yn sa sdang ban siang noh da u phlang plastik (artificial turf) ha madan Jongksha.
Shuh shuh u la pynpaw ka jingkmen bad sngew sarong ba ki samla ïalehkai phutbol na ka thaiñ ki la kiew sha khmat bad poi ban ïalehkai na ki klob ba pawkhmat ka nongbah Shillong kumjuh sha kiwei pat ki Jylla.
Ka Mawkynrew SC kaba long ka lahduh ka la ïohpdiang ïa ka song pisa kaba T.2 lak tyngka lem ka trophy, katba ka Wahla-khiat FC ka la ïoh T.1 lak tyngka ryngkat ka trophy. Katba ha ka liang ki kynthei, ka Kharang SC ka la ïoh T. 30 hajar tyngka lem ka trophy kum ka lahduh katba ka Pingwait SC kaba la ïoh T. 20 hajar tyngka lem ka trophy.
Ïa ka khusnam Best Player la ïoh rah da u Pynbhalang Suting na ka Wahlakhiat FC, Best Goal -keeper ka leit sha u Ïaineh Nongpluh na ka Mawkyn-rew SC bad Top Scorer sha u Learningstar Warlar-pih na ka Mawkynrew SC.
La pynkup burom ruh ïa ka Kong Riïohlang Dhar, kaba dei kawei na ki Match Official kaba dangshen ka la shah jied bad shah ithuh kum ka International Referee da ka Federation of Interna-tional Football Associa-tion (FIFA).
Nalor kane la sam ruh ïa ki khusnam sha ki nongjop na ka jingïakob ïaid March Pass ba la pynlong ha ka sngi plie pyrda ïa kane ka lympung.
