Shillong, Nohprah 29
Ka Laitkor SC bad ka Pay For Right Football Academy ki la long ba la pynkhreh ban ïaknieh ïa ka nam lahduh ha ka Women’s Football League 2024 ba la pynïaid da ka Shillong Sports Association ha ka Lah Sngi U Blei ha ka por 2 baje nohphai sngi ha SSA Stadium kaba ha First Ground, Polo.
Ha ki jingïakhun semi final kiba la long ha ka 27 tarik mynta u bnai, ka Laitkor ka la lah ban pynliem noh ïa ka Rangdajied United FC lyngba ka tie-breaker da 5-3 kol hadien ba ki la ïakhaid mar 2-2 kol.
Haba phai sha kawei pat ka jingïakhun kaba ar, ka PFR ka la lah ban pynliem ïa ka Lumparing SC da 3-2 kol.
Kumba ka paw ka Laitkot bad ka PFR ki dei ki kynhun kiba la lah ban ïalehkai bha ha kane ka lympung mynta u snem, ha kaba ki la lah ban pynliem ïa kiba bun ki kynhun liang pyrshah. Te kumta kine ki kynhun kin pyni ïa ka jingkhlaiñ bor na ka bynta ban ïaknieh ïa ka nam lahduh.
