Nongstoiñ, Nohprah 29
Ka jingkynrei jong ki kam tuh kam thiem ha ki bynta jong ka sor Nongstoiñ da kaba lied ïa ki dukan bad kiwei kiwei haduh kine ki sngi kam pat shym la kut satia. Kane ka la buh shisha hapdeng jingeh bad ka jingsyier ïa ki nongshong dukan bad kiwei kiwei de.
Katkum ka tyllong khubor la ong ba dang ha kine ki khyndiat sngi ba la dep, kawei ka dukan shna ksiar ha sor Nongstoiñ kaba dang hap ruh ka dong Mawbyrshem jong ka shnong New Nongstoiñ ka la shah lied ha ki katto katne ki runar ki bym shym la tip ki dei kiei.
Haba ïakren bad ki trai jong katei ka dukan, ki la ïathuh ba katei ka jingjia ka la jia naduh ka 22 tarik u bnai Nohprah 2024 ha ki por 6.30 janmiet eiei. La ong ba ki nongtuh hadien ba la lied ïa ka dukan ki la rung shapoh bad rong tuh noh ïa ka synduk buh ksiar (iron save).
Ki trai dukan ki la ïathuh ruh ba ha kane ka ‘iron save’ ka don kumba 3 tula ka ksiar, bad kine ki nongtuh ki la rong tuh ruh ïa kawei ka mobile phone, kawei ka tablet, ki mawlynnai kiba shong dor kumba saw phew hajar tyngka.
Shuh shuh ki la ong ruh ba katei ka jingjia ka la jia ruh tang ha ki khyndiat kynta ba ki trai jong katei ka dukan kiba thiah miet ha katei ka dukan ki dang leit sha ïing ban leit bamja hynrei hadien ba ki la leit biang sha ka dukan ki la lap pynban ba ka dukan ka jong ki, ka la dep ban shah lied bad shah tuh.
La ong ruh ba hadien katei ka jingshah tuh tang hadien katto katne sngi la don pat ki briew kiba la wan ïathuh sha ki, ba ki lap bad shem ïa ka synduk buh ksiar ha kawei na ki jaka ha khrum jong ka jingkieng Wahriat. Kumta na ka liang ki trai jong katei ka dukan ruh mar-mar ki la leit sha katei ka jaka bad la lap shisha ïa ka synduk buh ksiar. Na ka liang ki trai dukan ki la suba jur ba kitei ki nongtuh hadien ba ki la lied bad pynpra ïa ka synduk bad shim ruh ïa ki ksiar, ki la leit ban bret noh ïa ka synduk ha katei ka jaka.
Shuh shuh ki la ïathuh ruh ba hadien ba ki la lap ïa ka synduk buh ksiar ki la pyntip sha ki pulit ka Nongstoiñ, kiba la wan poi mar-mar sha katei ka jaka bad ban lap ïa ka synduk buh ksiar. La ong ruh ba na katei ka jaka la ïoh ruh ban tam katto katne ka ksiar bad ki mawlynnai ïa kaba la suba ba ki nongtuh ki la iehnoh ha ka por ba ki leit ban bret ïa ka synduk ha katei ka jaka.
Ki trai dukan ki la ong ruh ba hadien kane, na ka liang ki pulit ki la sei noh ïa ka synduk na katei ka jaka bad la ong ruh ba na ka liang jong ki trai dukan ki la dep ruh ban buh ïa ka ejahar (FIR) halor katei ka jingjia ha ki pulit ka Nongstoiñ.
Halor katei ka jingjia, ki trai jong katei ka dukan shna ksiar ki la pynpaw ïa ka jingsngewkhia kaba jur ïa ka jingïai kynrei jong ki kam tuh bad ki la kyntu bad ban jur ïa ki pulit ba la kumno-kumno ki dei ban shimkhia ban buddien ïa ki runar kiba la donkti ha katei ka kam tuh khnang ba nangne shakhmat kan ym jia shuh.
Halor kane ka khubor, ka Village Defence Primary Committee Nongstoiñ Area (VDPCNA) lyngba u President, Bah Mawkordor Kharsyiemlieh, u la ong ba na ka liang ka VDPCNA ka pynpaw ïa ka jingsngewkhia kaba jur halor ka jingnang ïai jyllei jong ki kam tuh hapoh Nongstoiñ. Kumta na ka liang jong u Bah Mawkordor u la kyntu ïa ki pulit ba kin shimkhia bad dei ban kem ïa ki nongtuh ban lait na ka jingshong syier ïa kiba bun balang.
Halor kane ka jingjia, ka khubor na ki pulit ka ong ba ka jingthwet ïa ki briew kiba donkti ka dang bteng bad ka jingtohkit ruh ka la ïaid shakhmat.
