Tura, Nohprah 29
U nongtrei mon sngewbha, Cherian Momin u la thoh sha u Myntri Rangbah ka Jylla, u Conrad Sangma ban kyrpad phah sangeh mardor ïa ka jingwan kit maw ba shalan na Bhutan sha Bangladesh – da kaba pyndonkam ïa ki Jylla Assam bad Meghalaya na ka bynta ka jingïaid lynti.
U Cherian u la dawa ruh ïa ka jingtohkit halor kane ka kam, bad ong ba ki long kiba la pyndonkam bakla bad kiba long be-aiñ ha ka jinglong-jingman.
“Kine ki kam ki la kylla long pynban ka jingïadei hapdeng ka jingkit palat pud, ka jingpynkit mar da ka kynhun khlem ka jingbit, ka jingdawa, bad ka jingpynjot ïa ki jingtei. Ka long kaba donkam eh ba ka Sorkar Jylla kan rai bad leh eiei noh mardor ban pynsangeh ïa kine ki kam be-aiñ, ban pyntikna ïa ka jingbud ryntih ïa ki kyndon jong ka jingïateh kular, bad ban ïada ïa ka bit ka biang jong ki paidbah bad ki jingtei jong ka Meghalaya,” ong u Cherian ha ka jingujor.
U la kdew ba wat la ka jingthmu na bynta ka khaïi-pateng hapdeng ka Bhutan – India – Bangladesh ka long kaba dei ban ïaroh, hynrei donkam ban leh hapoh ka saiñdur jong ka jingïateh kular.
“Ki trok kiba pyndonkam mynta na ka bynta ban kit maw kim dei na Bhutan. Kane ka dei ka jingpynkheiñ ïa ki kyndon jong ka jingïateh kular, da kaba pyrkhat ba ki trok jong ka Bhutan kin pynkit ïa ki maw. Nalor kata, ka long ka jingshisha ba ki trok ba bun ‘axle’, kiba mynta la ïohi kiba treikam bha ha kine ki lynti, kim treikam ha Bhutan. Kane ka buh jingkylli halor ka jingshisha bad ka jinglong aiñ jong kine ki jingtreikam,” u la bynrap.
U Cherian u la kynnoh ba ïa kane ka jingpynkit la leh da ki ‘Third Party Mafia’ bad ki kynhun be-aiñ na India kiba pyndonkam bakla ïa ka jinglong-jingman na ka bynta ka jingmyntoi shimet jong ki. Kane, u la pynsngew, ka la pynlong ïa ar tylli ki surok, kiba long ruh ki lad jingim na bynta ki nongshong shnong ka Ri-lum Garo (NH – 51 bad AMPT) ban mad ïa ka jingjulor kaba jur bad pynmih ruh ïa ka jinglong-jingman jong ka jingtieng bad jingbym tikna hapdeng ki nongshong shnong ka thaiñ.
U Cherian u la bynrap ba ki don ki sabut kiba biang ban pyni shai ïa ka jingkit palat pud (be-aiñ) jong ki trok ha baroh ar tylli ki lynti ba pyndonkam ban shalan mar shabar ri bad ïa kane ka jingshisha lah ruh ban pynskhem lyngba ki jinglap jong ka RTI.
Haba dawa ban pynsangeh noh mardor ïa kine ki kam, une u nongtrei mon sngewbha u la sngew ba dei ban pynsangeh noh mardor ïa ki trok ‘Third Party’ na India bad donkam ruh ban batai ïa ka lynti kaba shai na ka bynta kine ki kam. U la pynpaw ba dei ban iehnoh ïa ka lynti NH – 51 (Paikan – Tura – Dalu), ha kaba ki kam kit mar ki dei ban bud ryntih ïa ki kyndon aiñ.
U Cherian u la dawa ruh ïa ka jingtohkit laitluid halor kine ki kam bad kyrpad ïa ka Sorkar ban pynngat ïa baroh kiba donkti ba kin shim ka jingkitkhlieh.
