Jowai, K’Lyngkot 03
Kumba ju long man u snem, ka 1 tarik u Kyllalyngkot, ka jingpdiang burom ïa ka jingwan u snem thymmai ha sor Jowai ka ju long kaba shongshit bad shongkun bha na ka jingïashim bynta ki Dorbar Shnong bad ki kyntoit dong bapher-bapher.
Hadien ba la dep ka jingbam ja khawai sngewbha kaba shisien shisnem ha man la ki shnong bad ki dong, ki nongshong shnong ki la ïamih paidbah ban leit shad kmen ha kylleng ki shnong ki dong ka sor Jowai hapdeng ki sur kiba pynum bad pynkyndeh ïa ka mynsien jong ki nongshong shnong.
Ha kane ka 1 tarik u Kyllalyngkot, 2025 ruh la sakhi biang ïa ka jingïashim bynta shitrhem ha ka jingshad kmen da baroh ki nongshong shnong naduh ki longkmie-longkpa, ki samla kynthei bad shynrang kumjuh ki khynnah.
Hadien ka jingshad na kylleng ka sor Jowai, ki Dorbar Shnong ki la wan ïuhkjat sa ha Ïawmusiang ban pyni ïa ki jingshad ryngkat ki jingrwai kiba kit jingmut bad ki rukom tem kiba pynshongshit ïa ka shnong ka thaw.
Ha Ïawmusiang la pdiang burom ïa ki Dorbar Shnong da nongïalam ka Synjuk Waheh shnong Jowai, ryngkat ka ophis District Tourism Officer, District Tourism Promotion Society ka Sorkar Jylla bad District Administration, West Jaintia Hills.
Ha kane ka sngi la donlang u Dolloi ka Elaka Jowai, Bah Puramon Kynjing uba la aiti ïa ki syrnod bad song pisa kaba T.20 hajar sha baroh ki Dorbar Shnong ba ïashim bynta ba la synñiang da ka tnad Tourism.
Ha une u snem la don 18 tylli ki Dorbar shnong kiba la shim bynta ha ka jinglehkmen snem thymmai kynthup ka Khimusniang, Chutwakhu, Ladthadlaboh, Tympang Iawmusiang, Lion Mission Compound, Mynthong, Tpeppale, Dongmihsngi, Khliehmynkrem, Khliehiongriang, Myntdu Pynthornein, Saloroh, Loomsooiung, Moosalyngkat, Mookyrdup, Lumpariat, Panaliar bad Caroline.
