Shillong, K’Lyngkot 03
Ka ïing ka sem jong uwei na ki khlur ïalehkai phutbol ba la pawnam ka Jylla, Bah Agustine Kharkongor, ha ka sngi Thohdieng ka la plie ïa ka lympung ïalehkai ki heprit ba la tip kum ka (L) Josephine Kharkongor Memorial U-13 Football Tournament ha madan ïalehkai jong ka Rangdajied United FC Performance Centre kaba ha Lumshyiap, Shillong.
Ha kane ka lympung la khot sngewbha ïa phra tylli ki kynhun ban wan ïashim bynta. Kine ki kynthup ïa ka PFR Academy, Mawlai Grassroot Centre, Umpling Kickers Acaemy, Shillong Soccer Scout kiba don ha ka Group-A. Katba ha ka Group-B pat ki long ka DBSA, Young Age Academy, J. K FC bad ka Rangdajied United Fc.
Haba ïadei bad kane, la ïoh ban ïakren bad u Bah Agustine Kharkongor uba la pynpaw ba ka jingpynlong ïa kane ka lympung ka long kum ka dak ban burom ïa ka lyngkhuh dap saw snem ka jingkhlad noh jong i kmie jong u, Kong Josephine Kharkongor, ha kaba ka madan kaba la pynlong ïa kane ka lympung ïalehkai ka dei ruh ka jaka ka jong i kaba wat lada la aiwai sha ka Rangdajied, hynrei ka ïing ka sem ka don kti lang bad kane ka klob.
U Bah Agustine u la pynpaw ba ha kane ka sien kaba nyngkong la rai ban khot ïashim bynta shwa tang kitei phra tylli ki kynhun kaba lehse ha u snem ban wan yn sa lah ban nang pynheh shuh shuh ïa ka jingshim bynta jong ki kynhun ïa kaba la buh ban ïaleh ban pynlong ruh manla u snem. Namar kum ka longïing ka longsem kaba la sei ruh ïa kiba bun ki nongïalehkai, da kumta ki kwah ba ki khynnah ha kane ka juk kaba mynta kin ïoh em ïa kane ka kabu ksiar ba kin ïalehkai.
Ïa kane ka lympung la buh ban pynlong ha ka dur jong ka league system, ha kaba ar tylli kynhun ki ban wan ha ki kyrdan ba-ar kin ïoh rung sha ka semi final bad ïa ka final la thmu ban pynlong ha ka 7 tarik mynta u bnai.
