Jowai, K’Lyngkot 03
Kawei ka thuk-thuk ka la shah rong tuh ha ka 3 tarik Kyllalyngkot na Mookyrdup, West Jaiñtia Hills District.
U trai jong kane ka thuk-thuk, Deiwaiarapmi Tang u la ujor da ka ejahar ha Jowai Police Station ha kajuh hi ka sngi.
Kane ka thuk-thuk ka don ïa u nombor ML-05-W-0818, Model KTM RC 125.
Haba kyntu ïa ki paidbah, na ka liang u Superintendent of Police jong ka West Jaiñtia Hills u la pyntip ba la bunsien la ïoh jingujor halor ka jingshah tuh ki kali ar shaka hapoh ka District, bad na ka liang ki pulit ruh ki la pyrshang katba lah ban khanglad ïa kum kine ki kam runar ha kaba ki la pynlong ruh ka jingpahara bad ka jingkhynra kyrpang ha kaba la ïoh ruh ban kurup ïa ki katto-katne ki thuk-thuk ba la shah tuh.
Kumta u la kyrpad ïa baroh ki trai kali ar shaka ba kin pynïeng ïa ki thuk-thuk ha ka jaka kaba shngaiñ bad ruh ban shim ïa kiwei pat ki lad jingïada na ka bynta ka jingshngaiñ.
U la kyntu ruh ïa ki paidbah ba kin pynpoi ïa ki jingtip ha ka por kaba biang sha ki thanat ba jan tam lane ban ‘phone’ sha Police Control Room (9774065467) lada ki ïohi ïa kino-kino ki jingsuba lane kino-kino ki kali, ar shaka kiba suba ka rukom ñiah.
