Shillong, K’Lyngkot 05
Ka Meghalaya Arm Wrest-ling Association (MAWA) ka la pynlong ïa ka 34th State Arm Wrestling Cham-pionship & 2nd Para State Arm Wrestling Champion-ship 2025 naduh ka 12 bad pynkut ha ka 14 tarik u Nohprah 2024 ha Madan Malki.
Ha kane ka lympung la wan shim bynta da 500 ngut ki nongïalehkai ïakhun kti na kylleng ka Jylla kiba la shim bynta ha ki kyrdan bapher bapher, kaba la pyni ïa ka jingtbit bad jingkhlaiñ jong ki.
Kane ka lympung ïalehkai ka dei ka rynsan ban jied ïa ki nongïalehkai kiba khlaiñ, tbit, bad janai ban mihkhmat ïa ka Jylla ha ka National Arm Wrestling Championship 2025, ka ban long ha Dehradun, Uttarakhand. Ha kane ka jingïakop la sakhi ïa ka jingïashim bynta jong ki jaka kilanmet bapher bapher (Arm Wrestling Gym) bad ki seng lane ki synjuk na ki district kaba la pynitynnad shuh shuh ïa kane ka jingïakop.
Kaba kham sngewtynnad hangne ka long ba u Alan Sun Marbaniang u la ïoh ban rah ïa ka nam nongjop kum u Champion of Champion (COC) kaba 13 sien, kaba pynskhem ïa ka pateng jong u ha ka kam ïalehkai ïakhun kti hapoh ka Jylla. Ha ka jingïakhun jong ki kynthei, ka Senebi Syngkli ka la rah ïa ka nam lahduh jong ka Women’s Overall COC, kaba la pynpaw shuh shuh ïa ka jingsynshar jong ka ha kane ka jingïalehkai.
Kumba ka paw ba dei tang ka MAWA kaba la plie lad ruh ïa ki nongïalehkai kiba don jingduna ha ki dkhot met (Para Arm Wrestling) da kaba ailad ba kin pyni ïa ki sap ïakhun kti ba kyrpang ha la ki jong ki kyrdan ïalehkai.
Haba phai sha ki nongjop ha ka Youth Women (Below 50kg), la rah da ka Ibankyntiew Pamjad, ba-ar ka Aibankyrmen Wanñiang bad balai ka Anisha Jyrwa. Ha ka Below 55kg la rah da ka Senebi Syngkli, ba-ar ka Banrihun Lyngdoh bad balai ka Ailinda P. Lyngkhei. Ha ka Below 60kg la rah da ka Simisha Thabah bad ba-ar ka Ibakordor Kharumnuid. Ha ka Below 65kg la rah da ka Olivia Dkhar, ba-ar ka Monjca Syntan bad balai ka Larisha Kharbani. Ha ka kyrdan ïalehkai jong ka Below 70kg+ la rah da ka Phidalin M. Pathaw.
Ha ka Senior Women jong ka Below 50kg la rah da ka Angelis Kharumnuid, ba-ar ka Airikmenlang Shabong bad balai ka Aiberis Sten. Ha ka Below 55kg la rah nam jop da ka Senebi Syngkli, ba-ar ka Bandarika Kharkongor bad balai ka Banrihun Lyngdoh. Ha ka Below 60kg la rah nam jop da ka Wandalin Syiemïong, ba-ar ka Parkles T. Lyngkhei bad balai ka Saralin Kurbah. Ha ka Below 65kg la rah nam jop da ka Olivia Dkhar, ba-ar ka Aiboklin Rina bad balai ka Blesgiri Kharraji. Ha ka Below 70kg la rah nam jop da ka Ribasuk Lyngdoh, ba-ar ka Sperian Nongrang bad balai ka Wanrihun Warnri. Katba ha ka Below 80kg+ la rah nam jop da ka Mimiles Sangma, ba-ar ka Ïaryngkador Kurkalang bad balai ka Mihsngewbha Rymbai.
Ha ka kyrdan ïalehkai jong ka Youth Men (Below 55kg) la rah nam jop da u Frankystar Mawlieh, ba-ar u Donboklang Shadap bad balai u Cleverson Langstang. Ha ka Below 60kg la rah nam jop da u Dapkmenlang Lyngdoh Nonglynkien, ba-ar u Pynkupborlang Ïawphniaw bad balai u NeverJune Mawlieh. Ha ka Below 65kg la rah nam jop da u Jimmison Marweiñ, ba-ar u Ripheitki Saio bad balai u Welldone Rympei. Ha ka Below 70kg la rah nam jop da u Damewanhi Kharjana, ba-ar u Willbartson Shangoi bad balai u Loukas Kurbah. Katba ha ka Below 90kg+ la rah nam jop da u Jeffrey Kharmawphlang.
Ha ka kyrdan Senior Men jong ka Below 55kg la rah nam jop da u Hubert Paliar, ba-ar u Roderick P. L. Lyngdoh bad balai u Lewisley Mawlieh. Ha ka Below 65kg la rah nam jop da u Jimmison Marwein, ba-ar u Jackson Lyngdoh bad balai u Ainoklang Paul Wanñiang. Ha ka Below 75kg la rah nam jop da u Nangapjingbha Nongrum, ba-ar u Willbertson Shangoi bad balai u Brandon Tariang. Ha ka Below 110kg la rah nam jop da u Banbatjuban Khongwir bad u Dappura Siangshai u la jop ha ka 110kg+.
Ha ka Para Arm Wrestling Highlights jong ka HI Standing 60kg, la rah nam jop da u Hubert Paliar, ba-ar u Banlamjingshai Syiem bad balai u Francis Kharbani. Ha ka HI Standing 70kg la rah nam jop da u Shanborlang Siangshai, ba-ar u Johnkit Maring bad balai u Healingson Syiemlieh. Katba ha ka PIU Para Open Category la rah nam jop da u Banshanlang Terang, ba-ar u Ferdinand Kharlukhi bad balai u Banang Khymdeit.
