New Delhi, Kyllalyngkot:
Ka Supreme Court ha ka sngi Thohdieng ka la ong ba ki shuki ha ki jingpule doktor kim dei ban sah thylli bad ka la bthah ïa ka sorkar kmie ban lum jingïalang bad ki nong-kitkam ba dei peit halor kane ka mat.
Ka kynhun jong ar ngut ki nongbishar jong ka ïingbishar ba ha khliehduh, kaba la ïalam da u Justice B.R Gavai bad u Justice K.V Viswanathan, kaba dang sngap ïa ka jingkyrpad kaba la pynpaw ïa ka jingsngewkhia halor ki shuki kiba thylli, ka la ïohi, “Ki shuki kim lah ban sah thylli.”
Kham mynshwa, ka ïingbishar ba ha khliehduh, ka la pynpaw ïa katei ka mat, ha kawei na ki jingbishar jong ka, hadien ba ka la tip ba ki jaka shong ba kyrpang ha ki jingpule sumar, ki dang sah thylli.
Ha ka jingbishar ha ka sngi Thohdieng ha ka ïingbishar ba ha khliehduh, u nongïasaid aiñ jong u nongmudui u la ong, kan long kaba dei lada ka sorkar kmie kan pynlong ïa ka jingïalang bad ki nongshim bynta bad kan mih da ka jingtyrwa kaba skhem.
Hadien ba la sngap ïa kane, ka kynhun nongbishar jong ka ïingbishar ba ha khliehduh ka la bthah ba ka jingïalang kan long da ka sorkar kmie ban pynbeit ïa kane ka jingeh ha ki jaka sumar ha kylleng ka ri. Ka kynhun nongbishar ka la bthah ruh ba ïa kaba donkam dei ban leh hapoh lai bnai katba dang buh ïa kane ka kam ban bishar bniah ha u bnai Ïaïong.
Ka ïingbishar ba ha khliehduh ka la ong ba katei ka jingkyrpad ka pyni ïa ka “dur kaba sngewsih shibun” haba kheiñ ba 1,003 tylli ki jaka kiba kordor kin sa jah rngai namar ba ym lah ban pdiang Admission na ka bynta kine ki jaka.
“Ha kawei ka liang, ngi lap ba ka don beit ka jingduna jong ki doktor kiba tbit bha bad ha kawei pat ka liang kine ki jaka shong ba kordor ki sah khlem pyndap,” la ong ka ïingbishar ba ha khliehduh kaba dap da ka jingsngewkhia.
Kham mynshwa ruh, ka sorkar kmie ka la ai jingmut ïa ka ïingbishar ba ha khliehduh ban thung ïa ka komiti, kaba kynthup ïa baroh ki nongshim bynta kynthup ïa ki nongmihkhmat jong ki jylla bad ki Medical College jong ki riewshimet, hapoh ka jingpynïaid jong u Director General jong ka tnad ka koit ka khiah ban pynbeit ïa kane ka jingeh.
Ha ka sngi Thohdieng, ka sorkar kmie ka la ong ba la thaw ïa ka komiti kaba kynthup ïa ki nongshim bynta bad ka la ai ïa ki jingai jingmut jong ka bad ha ka jingïaid lynti ban pynbeit ïa ka jingeh jong ki jaka kiba sah thylli.
