Guwahati, Kyllalyngkot:
U Myntri Rangbah ka Assam, Himanta Biswa Sarma, u la bthah ïa ki MLA ka seng ba kin pyntreikam hok ïa ki skhim ai jingmyntoi jong ka sorkar bad ban pynthikna ba ki jingmyntoi kin poi sha ki bynta ba shah iehnoh beiñ tam jong ka imlang-sahlang.
Ka ilekshon Panchayat kan long ha kane ka jylla mynta u snem bad ka ilekshon Assembly ka ban sa long ha u snem 2026.
Dang shen u la pynlong ïa ka jingïalang bad ki MLA ka seng bad ïakren ha kaba ïadei bad ka ilekshon Panchayat bad ka ilekshon Assembly jong u snem ban wan. U Myntri Rangbah u la bthah ïa ki MLA ban pynksan ïa ka jingtreikam kaba bha ha ka ilekshon Panchayat.
Dang shen u Sarma u la kyntait ïa ki jingkynnoh ba ki Hindu ki wan rung na Bangladesh, da kaba ong ba ki bor pahara jong ka jylla kim shym la lap satia ïa ki nongwan buhai shnong ki Hindu na Bangladesh ha kine ki san bnai ba la dep.
U CM Sarma u la ong, “Ngi la buh ïa ki bor pahara ha ka jingkhmih lynti kaba khraw ha khappud jong ki ri ka pyrthei hadien ka jingkulmar ha Bangladesh ban peitngor ïa ki jingwan rung tuh. Ki pulit ki la lap ïa ka jingbun ki nongwan buhai shnong beaiñ man ka sngi ha shi lynter jong ka International Border; hynrei ym shym la kem ïa u nongwan rung tuh jong ki Hindu na Bangladesh ha kine ki san bnai ba la dep.”
“Kiba bun ki briew kiba dei na ka jaitbynriew Hindu, kiba don ka jingangnud ban ïaid lait ïa u pud u sam bad wan sha India, ki la wan shane 30 ne 40 snem mynshwa. Kiwei pat ki jaitbynriew rit paid ki la sahkut ha Bangladesh watla ki la mad ïa ki jingshah lehbeiñ kiba heh ha ka ri ba marjan. Nga tharai ba ki don la ki jong ki daw ban sah hangtei – ka lah ban dei ka jingïeid ïa ka khyndew ne ka jingïeid ri ïa ka ri Bangladesh,” u la ong shuh shuh.
