Nongstoiñ, K’lyngkot 05
Kawei ka longïing na ka shnong Sangriang ha West Khasi Hills, ka la duh noh ïa la ka jong ka ïing hadien ba shah bam duh noh ha ka ding kaba klang katta-katta ha ka por ba ki dang leit sha ka jaka ïa khawai khristmas hapoh ka shnong.
Halor kane ka jingjia, ka Hynñiewtrep Youths’ Council (HYC) West Khasi Hills District hapoh ka jingïalam u samla Lumlang Kharsyiemlieh ryngkat ka HYC Nongstoiñ Circle hapoh ka jingïalam u samla Iainehskhem Ryntathiang ryngkat ki dkhot bad nongïalam ka HYC Nongkhnum ha ka sngi 4 tarik u bnai Kyllalyngkot 2025 ka la ïoh ban leit kner ïa ki jingïarap ïa kane ka longïing kaba dei jong ka Kong Bisida Marshra.
Ka khubor na ki nongïalam ka HYC la ïathuh ba katei ka longïing ka la mad ïa katei ka jingduh noh ïa ka ïing na ka pluh ding ka dei naduh ka 27.12.2024 ha ka por 12 baje shiteng sngi katba ki dang leit sha ka jaka khawai Khristmas hapoh ka shnong.
Shuh shuh la ong ruh ba la suba jur ba katei ka jingjia bad ka jingpluh jong katei ka ïing ka lah ban dei na ka jingthut ha ka bording ilektrik bad ka la wanrah tang ka jingjulor bad jingduh noh ïa ka ïing hynrei ym don ka jingjia eiei ïa ki mynsiem briew.
Ha kane ka sngi ka HYC ka la ïoh ruh ban aiti ïa ki tin sop ïing, u khaw bad kiwei de ki jingïarap ha ka jingdonlang u Babu O Sangriang, Sordar ka shnong Sangriang.
