Shillong, K’lyngkot 05
Ka Khun Hynñiewtrep National Awakening Movement (KHNAM) ka la pynpaw ïa ka jinglyngngoh ngaiñ halor ka jingtuklar jong u Symbud Myntri Rangbah ka Jylla bad uba dei khmih ruh ïa ka District Council Affairs, Bah Prestone Tynsong uba la pynbna ïa ka tarik ban pynlong ïa ka ilekshon MDC sha ar tylli ki Autonomous District Council ha Rilum Khasi bad Jaiñtia wat la ka dei ka bynta jong ka ophis jong u Lat ka Jylla ban pynbna ïa ka tarik ban pynlong ïa ka ilekshon.
“Kumno ïa kane ka jingpynbna la pynbna da u Symbud Myntri Rangbah ka Jylla bad uba dei khmih ïa ka tnat DCA hynrei ka dei ban wan da ka jingpynbna napoh ka ophis jong u Lat ka Jylla. Ngi ïohi ba ka don ka jingtuklar bad ka jingmushlia jong ka Sorkar Jylla ha ki kam-ki jam kiba ïadei jong ka District Council”, ong u Bah Thomas.
Ha ka jingïakren bad ki lad pathai khubor ha ka 4 tarik Kyllalyngkot, 2025, u Bah Thomas u la ong ba ka jingpynjlan ïa ka samoi treikam jong ar tylli ki Autonomous District Council ha Rilum Khasi bad Jaiñtia sa shisien wat hadien ba ka samoi treikam kaba 5 snem pura ka la kut noh, ka dei ka jingleh donbor jong ka Sorkar Jylla.
U la ong ba wat hadien ka jingpynjlan ïa ka samoi treikam jong ka District Council da shisnem kynthih ban pynbeit thymmai ïa ki konstitwensi hynrei la sakhi pat ba ki la don bun tylli ki shnong-ki thaw ki bym sngewhun satia ïa ka rai jong ka District Council ha kaba ki la don ruh ki shnong kiba la mih shakhmat ban pynbna paidbah ba kin pynsangeh ha ka ban ïashimbynta ha ban thep ïa ki vote ha ka MDC ilekshon ka ban sa long ha u bnai Rymphang mynta u snem.
“Ka long kaba sngewsih bad ka don ka jingdkoh treikam jong ka District Council ha ka ban pynbeit thymmai ïa ki shnong ha ka jingleh kyrkieh ne lehse, ka dei tang ka buit ban shu pynjlan ïa ka samoi treikam”, ong u Bah Thomas.
U Bah Thomas u la ong ruh ba kumba ka long mynta, ka bor laitluid lane ka Autonomy Power jong ka District Council ka la duh noh namar ka jingtuklar shaba palat jong ka Sorkar Jylla.
