Washington, K’lyngkot:
Katkum ki kaiphod ba la ioh lum da ka tnat syntiat jong ka US, la ong ba uwei u shipai barim jong ka US uba la shah kynnoh ba u la leit sha Lebanon bad Syria ban pyniasoh ialade bad ka kynhun lehnoh Hezbollah, u la shah pynngat kyndon noh ha ki bor pyniaid hadien ba la kynnoh ba u la pyrshang ban ai jingkyrshan ia katei ka kynhun lehnoh da kaba thmu leit pyniasoh ialade.
U Jack Danaher Molloy, 24 snem ka rta, uba dei trai shnong na US-Ireland, u la shah kem ha Chicago mynshem bnai bad la wallam pat ia u sha Pennsylvania ha ka Sngi Nyngkong ban bishar bniah ia ki kyndon pynkheiñ aiñ ki ban pynngat ia u bad ban pyniahap ruh katkum ki jingleh pynkheiñ aiñ jong u haba iadei bad katei ka kam.
Kat kum ka jingmudui, u Molloy, u la leit sha Lebanon ha u Nailar bad u la wad lad ban leit pyniasoh noh ialade sha katei ka kynhun lehnoh Hezbollah ba shyrkhei jong ka Lebanon.
Hadien kata, la ong ba u Molloy u la leit phai biang pat sha United States, ha kaba la suba ba u la bteng ia ki kam jong u ban pyrshang ban iatrei lang bad ki dkhot jong katei ka kynhun lehnoh na Lebanon, da kaba iakren ruh bad ki dkhot ka Hezbollah kiba na Lebanon lyngba ka jingiakren phone bad ka jingiadei kam ‘online’.
Katkum ka kaiphod na ka Justice Department, u Molloy u ju pynshlur ïa ki kam thombor pyrshah ïa ki Jiw ha ki rynsan Social Media bad ha ka jingïakren WhatsApp bad uwei u bahaiing jong u, u la phla ba ka jingthmu ba kongsan jong u ka long ban pynïasoh noh ialade bad ka Hezbollah bad ban ioh pat ban leit thombor ia ki jaitbynriew Jiw.
Kumta haba iadei bad kane, la ong ba u Molloy u lah ban shah set patok haduh kumba 20 snem kynthih lada shah rai pynrem bad lada la lah ban pynshisha ba u la dep ai jingkyrshan ia katei ka kynhun lehnoh da kaba phah ia ki tiar iakhun sha kitei ki lehnoh jong ka Lebanon.
