Tura, K’lyngkot 06
Kumba 13 tylli ki dukan ha ka miet Sngi U Blei ki la shah bam duh ha ka ding kaba ka la sdang namar ka jingthut ha ka bording ilektrik ha Ïew Dawa Nengatokgre kaba don ha ka sor Williamnagar ha East Garo Hills.
Katkum ki khubor ba la ïoh lum, ki pulit ka EGH ki la ïoh jingtip halor katei ka jingpluh ding ha ka por kumba 11:44 baje hynnin mynmiet, ka 5 tarik Kyllalyngkot ha kaba hadien kane, baroh ki la mareh mar-mar ban shimkhia ïa katei ka jingjia.
Mar ïa poi ha katei ka jaka, ki nongtrei na ka tnad ïarap ba kyrkieh ki la lap ba 13 tylli ki dukan ha katei ka ïew ki la shah bam duh ha ka ding bad ki la shim ïa ki lad ki lynti ban tehlakam ïa ka jingpluh. Ha kaba kut, la lah ban tem noh ïa katei ka ding ha ka por 1:50 baje jong ka step 6 tarik Kyllalyngkot bad la suba ba ka dei na ka daw jong ka jingthut ha ka bording ilektrik. Ym shym la don kano-kano ka jingmynsaw ha katei ka jingjia.
