Shillong, K’lyngkot 06
Ki nongïalam ka Hynñiewtrep Youths’ Council (HYC) Sohïong Zone ha ryngkat ka jingïadonlang ki nongïalam ka HYC Nongthliew Circle, ha ka Lah Sngi U Blei jong ka 6 tarik u Kyllalyngkot, 2025, ki la leit ban ujor sha ka Deputy Commissioner (DC), East Khasi Hills District, ka Kong R M Kurbah halor ka jingpyrshah ïa ar ngut ki briew ba la tip kyrteng kum u Bah Phridensing Thabah bad u Bah Rojen Khyllait, da kaba kynnoh ba ki la donkti ha ka kam thok-kam shukor ha kaba ïadei bad ka jingsiew ïa ka bai lutksan (Compensation) ïa ka jaka na ka bynta ban shna ïa ka 2-Lane jong ka Shillong Western bypass.
Ha ka jingïakren bad ki lad pathai khubor, u President ka HYC Sohïong Zone, Bah Purningstar Shabong u la ïathuh ba kine ar ngut ki briew ki la donkti ha ka ban sei tuh ïa ka pisa da kaba pan da ka ‘Blank Cheque’ na ki trai jaka da kaba shim kabu ïa ka jingbym don ïa ka jingnang-jingstad bad ka jingbym sngewthuh jong ki ïa ki hok jong ki.
U Bah Shabong u la ïathuh ruh ba ka don kawei ka longkmie kaba la ïoh pisa kumba T. 3 klur tam hynrei utei u Bah Phridensing Thabah u la leit ban sei ïa katei ka pisa haduh T.94 lak bad u Bah Rojen Khyllait pat u la sei ïa ka pisa kaba T.2 lak tam jong kawei ka longkmie kaba la ïoh ïa ka pisa kaba T.13 lak tam bad kumjuh ruh jong kawei ka longkmie kaba la ïoh T.20 lak tam, utei u Rojen Khyllait u la leit ban sei ïa ka pisa kaba T.3 lak tam.
“Ngi sngewthuh ba kane ka dei ka kam thok-kam shukor kaba shyrkhei bha ha kaba ïadei bad ka Shillong Western bypass ha kaba ki don kine ki briew kiba dawa pisa da kaba pynbiej ïa ki briew lui-lui ban pan ïa ka ‘Blank Cheque’ khnang ba kin ïoh ban leit ai hapoh ka ophis hynrei kine ki la leh shalak da kumwei pat ban sei ïa ka pisa”, ong u Bah Shabong.
U Bah Shabong u la kyrpad ïa ki bor ba dei peit ban pynlong ïa ka jingtohkit halor kane ka kam bad ban leh ruh da kaba tyngeh ïa u Bah Phridensing Thabah bad u Bah Rojen Khyllait bad dawa ruh ban pynlong da ka jingtohkit ban lap lada don ki heh sorkar kiba donkti ha katei ka kam thok.
Nalor ka jingujor ejahar, ka HYC kan sa leit ban ïakynduh ruh ïa u Superintendent of Police (SP), ka Director General of Police (DGP), bad ki heh ka tnad Public Works Department (PWD) halor kane ka kam.
