Shillong, K’lyngkot 06
Ki dkhot ka NEHUSU bad ka KSU NEHU-Unit ha ka Lah Sngi U Blei ki la beh krad ïa u Registrar, Colonel (Retd.) Omkar Singh na ka skulbah bad khang tala noh ïa ka jingkhang ban rung jong ka Administrative Block jong katei ka skulbah.
Kitei ki kynhun jong samla pule ki la pynpaw ka jingbitar hadien ba ki la ïoh jingtip ba u Registrar u la rung tuh shapoh ka skulbah bad leit sha ophis lajong khlem da pyntip ïano-ïano.
U President ka NEHUSU, samla Sandy Sohtun u la pyntip ba ki la leit bran-bran sha ka skulbah ha ka por mynstep hadien ba ki la ïoh jingtip ba u Registrar u la don hapoh ka skulbah.
Utei u samla u la ong ba ki la wad jingtip na u VC In-charge, Prof. N. Saha uba la pyntip sha ki ba ym don jingtip eiei ba u (Singh) u la wan ïuh kjat ha ka skulbah.
Katkum ka jingong utei u samla, ki la leit ban jngoh ruh ïa ka jaka sah jong u Registrar bad ïohi ba u dang lum ïa ki ‘file’ bad ki kot ki sla jong u.
“Ngi la ong ïa u Registrar ba lada u kwah ban lum ïa kita ki tiar ki tar, u la dei ban phah ïano-ïano bad ngi la maham ba ngin ym ai lad ïa u ba un wan ïuh kjat ha ka skulbah”, la ong u President ka NEHUSU.
U la pyntip ba ki la beh krad ïa u na ka skulbah bad khang khyrdep ruh ïa ka jingkhang ban rung jong ka Administrative Block.
Shuh shuh u samla Sohtun u la bynrap ba kane kam dei ka sien banyngkong ba u Registrar u la wan sha ka skulbah khlem da pyntip ïano-ïano – naba u tip ba ym don mano-mano ruh namarba ka shuti tlang jong ka skulbah ka dang ïaid.
