Mexico City, K’lyngkot:
Ha kane ka khubor, la ong ba katei ka jingjia synreit kuli, ka la jia ha kawei ka jaka lehkmen kaba don sha ka thaiñ Shatei Mihngi jong ka Mexico, ha kaba 8 ngut ki la khlad bad 6 ngut pat ki la mynsaw ha katei ka jingjia katkum ba la iathuh da ki bor pyniaid ha ka Sngi U Blei. Kane ka dei ruh ka jingjia thombor kaba hadien duh ba kane ka ri ka la ioh mad ha kane ka sien.
Ki bor pyniaid ki la phah buddien bad thwet ruh ia ki nongleit thombor ha katei ka jingsynreit kuli naphang kaba la jia ha ka miet Sngi Saitjaiñ hapoh ka nongbah Villahermosa jong ka Tabasco.
Katkum ki sakhi bad ki kaiphod ba la ioh lum na kito kiba don ha katei ka jaka, la iathuh ba ha katei ka sngi la wan poi katto-katne ki runar kiba kieng suloi bad ki bym lah ban ithuh dur bad sei ia ki suloi jong ki ban synreit kuli naphang ia kat kiba don ha katei ka jaka dih-bam kaba don hapoh La Casita Azul.
Ka Tabasco, kaba don ia shibun ki jaka pynmih umphniang, ka la sakhi ruh ïa ka jingjur jong ki kam runar bad ki jingjia thombor naduh mynshem bnai.
Ha u Naiwieng, 6 ngut ki briew ki la duh ei ia ka jingim bad kumba 10 ngut pat ki la mynsaw ha kawei pat ka jingleit thombor jong ki kynhun runar ha kawei ka jaka lehkmen hi kaba don ha Villahermosa.
Kumta, la ong ba ka Mexico ka la sakhi ia shibun tylli ki jingjia thombor kiba iadei bad u droks, ha kaba ki la don palat 450,000 ngut kiba la khlad ha kitei ki jingjia ha kylleng jong katei ka ri naduh ba ka sorkar ka la phah ïa ki shipai ban ïakhun pyrshah ïa ka jingkhaii drok ha u snem 2006.
