Shillong, K’lyngkot 06
Ka khlur nongïalympat barim jong ka ri bad kaba kylla long ka ‘riew saiñ-pyrthei, ka Vinesh Phogat ka la don ïa ka jingdon-jingem kaba tang T.5 klur shwa ka Paris Olympic jong u snem ba la dep, hynrei mynta ka la kiew sha ka T.36.5 klur eiei, da ka jingai khublei ïa ki katto-katne ki jingïateh kular kiba la pynïohnong bha ïa ka, la ong ki khubor.
Ka Phogat, kaba la paw nam bha ha ka kam ïalehkai bad kumjuh ruh ha ka saiñ pyrthei, khamtam eh ka jingïakhih jong ki nongïalehkai ha u snem 2023 pyrshah ïa u heh barim ka WFI bad u nongïalam ka seng BJP u Brij Bhushan Sharan Singh, uba ki nongïaleh-kai ki la kynnoh ba u la jrong kti ïa ki ‘thei ïalehkai. Ka jingdiaw mynsiem ha ka Paris 2024 Olympics ha kaba ka (Phogat) ka la shah weng ban ïashim bynta ha ka jingïakhun phainal jong ka jingïalehkai 50 kg ki kynthei.
Hynrei, ka jingïakynad kaba la pynlong ïa ka ban duh noh ïa ka takma ksiar ha ka Olympic bad wat ïa ka takma rupa. Katkum ki khubor, la ong ba ka jingïa-lehkai jong ka Vinesh ha ka Olympic, nalor ba ka la pynmih ïa ka jingsngewtynnad kaba khraw ha ka ri, ka la kyntiew ruh ïa ka dor lyngba ka nam jong ka bad kumjuh ruh ïa ka bai kyrshan jong ka.
Kat kum ki khubor la ong ba ka Vinesh, ka la kamai T.25 lak, na ka bynta kawei ka jingïateh shwa ka Paris Olympics, hynrei na bynta ka bai lutksan ka la kiew haduh T.75 lak bad T.1 klur, na ka bynta kawei ka jingpynskhem, kaba ai jingkyrshan kaba khraw ïa ka spah jong ka, kaba don mynta ha ka T.36.5 klur. Ïa ki jingpynskhem jong ka Phogat la pynïaid da ka Cornerstone Sports, bad ki la kylla long ka lad kamai kaba heh bha na ka bynta ki nongjop ha ka Olympic kiba ka ïoh ruh ïa ka tulop kaba T.6 lak shisnem na ka tnad ïalehkai jong ka Sorkar Pdeng.
