Shillong, K’lyngkot 06
Ka jingkylla ka suiñbneng la nang sakhi ba uwei u snem sha uwei pat, ka jingkhriat ka la nang kham jur ha ka aïom Tlang bad ka jingshit ka la nang shit ha kiwei pat ki aïom.
Ha kane ka aïom Tlang kaba mynta, ki jaka ha ki Jylla ka Thaiñ Shatei Lam Mihngi ruh ki nang mad ïa ka jingkylla ha ka jinglong jingman jong ka jingshit jingkhriat (temperature).
Ha Assam, naduh ba sdang u snem thymmai, ka jingdait thah ka la nang jur ha kiba bun ki jaka kynthup ha Guwahati, Dibrugarh bad kiwei.
La pyni ba ka nongbah Guwahati, ka mad ïa ka jingshit jingkhriat kaba hiar sha ka 12.4 degree Celsius ha ka 1 tarik, kaba hiar da 1.4 degree na kaba ju long, nangta 13 degree Celsius ha ka 3 tarik bad 11.9 degree Celsius ha ka 4 tarik.
Ka nongbah Dibru-garh kaba dei ka thaiñ shatei jong ka Assam ka sakhi ba ka jingshit jingkhriat ka poi 10 degree Celsius bad ki don ki sngi ba ka poi 9.2 degree Celsius.
Ha Shillong, ka jingshit jingkhriat ka poi 5.7 degree Celsius ha ka 2 tarik bad ha nongbah Kohima ka long 6.5 degree Celsius.
Ka Shillong, ka kham syaid khyndiat ha ka Sngi U Blei (5 tarik) namar ka jingshit jingkhriat ka poi 7.5 degree Celsius, ha Imphal 7.7 degree Celsius bad Kohima 5.2 degrees Celsius.
Katkum ka Regional Meteorological Centre ha Guwahati la ïathuh ba ka jinglong tyrkhong ka suiñbneng ka lah ban don ha Arunachal Pradesh, Assam, Meghalaya, Nagaland, Manipur, Mizoram bad Tripura bad ka jingtap lyoh ka bym da rben kan don ha katto-katne ki jaka ha Arunachal, Assam, Meghalaya, Nagaland, Manipur, Mizoram bad Tripura.
Shuh shuh la batai ba ka nongbah Guwahati ka lah ban sakhi ïa ka jingshit jingkhriat kaba duna tam ka long 12 degree Celsius bad ka jingshit jingkhriat kaba kham kiew ka long kumba 25 degree Celsius.
