Itanagar, Kyllalyngkot:
Ki pulit jong ka Itanagar da ka jingjop ki la lah ban pynjem khnap ïa ka kynhun jong ki nong-leh kam sniew kiba donkti ha kiba bun ki kam tuh ha ka thaiñ jong ka nongbah.
Hadien ka jingtohkit kaba la neh shibnai, ïa kane ka jingkem la lah ban leh da ka kynhun pulit ba aiti lut ha ka jingïalam da u Inspector K. Yangfo (Officer-in-Charge, PS Itanagar) bad la ai jingkyrshan ruh da u Vivek Kr. Maurya (IPS), ha ryngkat ki SI RK Jha, Padam Padi, Tana Suraj, bad u Samuel Ngupok, hapoh ka jingpeit jong u Kengo Dirchi, SDPO ka Itanagar.Kumba la tohkit, la ong ba ki jingtuh jong kine kiba la shahkem, ka la long ïa ka pisa kaba T.3,00,000 na ka kali jong u nongujor shabar jong ka tnad SBI ha Itanagar.
Kiba la shah suba donkti ki la thok ïa utei u briew da kaba pynhap ïa ki pisa thok, kaba la riam ïa u tang ban ïoh tuh ïa ka pla pisa jong u.
Ha ka 9 tarik, Nohprah kawei ka briew ïa kaba la tip kyrteng kum ka Milli Ossen ka la pyntip ba ka la shah tuh pisa na ka Scooty jong ka kaba la pynïeng ha ka kamra ba shapoh jong ka V-Mart, ha ïew Ganga.
Ha ka 28 tarik, Risaw, jong u snem ba la lah, uwei u briew ïa uba la tip kyrteng kum u Dipak Deori, Engineer jong ka ATM, u la pyntip ïa ka jingshah tuh jong ka pisa kaba T.1,50,000 bad ki kot ki sla ba shimet katba u dang pynbiang ïa ka Machine ha SBI Main Branch Itanagar.
Ha ka 3 tarik, Kyllalyngkot 2025, da ka jingpyntreikam hadien ba la ïoh jingtip, ki pulit ki la kem ïa arngut ki briew kiba donkti hajan ka SBI Itanagar. Hadien la kem ïa uba shah suba uba lai ha ka jaka sangeh rel ha Harmutty katkum ka jingphla jong ki.
Ki briew kiba la shah kem, ki dei kiba la tip kyrteng kum u Chandan Gowala (57) u dei uba sah ha Rajganj, Jalpaiguri, West Bengal, u Deepak Sharma (57) uba shong ba sah ha Baradari, Bareilly, Uttar Pradesh, u Rakesh (47) uba shong ba sah ha Rajganj, Jalpaiguri, West Bengal
La ïoh kurup ruh ïa kawei ka thuk thuk Hero Honda Glamour kaba don ïa u number thok, kaba la pyndonkam ha ka ban leh ïa ki kam runar.
Ka kynhun runar ka ju leh ïa ka kam sniew ha phyllaw jong ki Bank bad ki jaka ïeng kali, da kaba peit bniah ïa ki briew kiba sei ne bat ïa ka pisa kaba bun.
Da kaba pyndonkam da ki buit thok kum ka jingpynhap ïa ka pisa thok ne ka jingthaw ban pynthut ïa ki, ki la tuh ïa ki mar kiba kordor.
Ka dur tymmen jong ki bad ka jingsah shipor jong ki ha Arunachal Pradesh ka la ailad ïa ki ban lait na ka jingshah suba sniew.
U Rohit Rajbir Singh, IPS, SP ka Itanagar, u la pynmih ïa ki jingbthah ïa ka jingshngaiñ ha kaba kyntu ïa ki nongshong shnong ba kin, kiar na kaba iehnoh ïa ka pisa kaba bun khlem da don baa p ne peit ha ki kali, ban long kiba husiar ha kylleng ki Bank bad pyntip sha ki pulit lada don ki kam sniew ne ki riewsniew, ban pyndonkam ïa ki jaka ïeng kali kiba shngaiñ bad pynthikna ba ki kali ki dei ban khang bha.
U SP u la ïaroh ïa ka jingtrei shitom khlem sangeh jong ka kynhun pulit, u la ïaroh ïa ka jingaiti jong ki ha kaba pynbeit ïa kine ki mukotduma, bad u la pynthikna ïa ki khusnam kiba biang na ka bynta ka jingtrei kaba long ka nuksa babha jong ki.
Ki pulit ka Itanagar ki pynskhem biang ïa ka jingkular jong ki ban pynthikna ïa ka jingshngaiñ jong ki paidbah bad ban ïakhun pyrshah ïa ki kam runar.
