Shillong, K’lyngkot 06
Ka Shillong Lajong FC wat lada ka la ïoh bun tylli ki kabu ksiar, pynban ha shwa ban wai ka la jop da 1-0 kol ïa ka Nongrim Hills SC ha ka lympung ïalehkai OC Blue Shillong Premier League 2024 ha ka Lah Sngi U Blei ha SSA Stadium kaba ha First Ground, Polo.
Kane ka shi kol ka la wan urlong lyngba u Deibor -mame Tongper (89) na ka bynta ban pynlong ïa ka Lajong ban ïoh lai point ha kane ka jingïakhun kaba hynñiew.
Kane ka dei ka jingïa -khun kaba nyngkong ïa ka Lajong ha ka SPL ba kan ïoh ïa ki 16 point ha une u bnai uba nyngkong. Kane ka jingïalehkai ka dei ka jingïalehkai kaba khatduh jong ka Nongrim Hills ha ka wat kaba nyngkong bad pynkut noh ïa lai tylli ki jingjop; na ki khyndai sien ïakhun, ka la jop saw sien, ïakhaid shisien bad shah rem saw sien ryngkat 13 poiñ.
Ka jingïalehkai kaba kongsan jong ka kylla step ka la wan lyngba ka jingpyni bor hapdeng jong ki bad ban pynlong ïa u referee ban ai jingsneng mar ar tylli ki yellow card. Dei ha ka kylla miet kaba la pynlong ban ïoh ïa ki kabu kiba biang, hynrei kine ki la shu long lehnohei.
U Deibormame u la ïoh ïa ka kabu kaba biang eh ban thep kol ha ka kylla miet shwa ban pynwai syndon ïa ka jingïakhun. Ha kaba nyngkong u la shut ïa ka bol sha kol ha kaba u rangapkol ka Nongrim Hills u Urbanity Makhroh u la lah ban kyrda da ka kjat shwa ba un tan ïa ka bol da ki kti. Hadien katto-katne minit kine ar ngut ki la ïakhun biang, ha kane ka kynti u Deibor u la ïoh ïa ka bol, hynrei u Urbanity u la lah ban kyrda biang da ka met.
Hapdeng kine kiei kiei baroh, ka Nongrim Hills ruh ka la pyrshang ban ïakhun tyngeh, ha kaba u Alem Khongwir u la thaw ïa ka lad ban thep kol, hynrei ki paralok jong u ki la shah khang arsien bad ha ka sien ba lai la ïohi ar ngut ki rangïalehkai ka Nongrim Hills ki la ïatyngkhuh hapdeng jong ki ha ka por ba ki dang ïaknieh ïa ka bol. U Banshemphang Kurbah jong ka Nongrim Hills u la ïoh ban shut ïa ka bol ha ka minit kaba 80 bad kawei pat da u Emanbha Marbaniang ka Lajong ha ka minit kaba 88, ha kaba ki la shu long lehnohei.
Hynrei tang hadien shi minit, ka SLFC ka la lah ban pynsngap jar ïa ki nongkyrshan ka liang pyrshah hadien ba u Deibormame u la ïoh ban thep hi jlang na ka bynta ban pynlong ïa ka Lajong ban ïoh shisyndon ïa ka jingjop.
Lyngba kane ka jingjop, ka Lajong (16 point) ka la jam sha ka kyrdan ba hakhlieh hadien ba ka la tam ïa ka Mawlai lyngba ka jingïapher kol.
Ka jingïalehkai ha ka Sngi Ba-ar kan long hapdeng ka Nangkiew Irat SC pyrshah ïa ka Rangdajied United FC ha ka por 2 baje nohphai sngi. Kine ar tylli ki kynhun ki la ïaryngkat mar 12 point, hynrei ka Rangdajied ka la tam lyngba ka jingïapher kol (+9 la -1).
