Shillong, K’lyngkot 07
Ka Sorkar Jylla ka la phai khmat sha ka Sorkar Pdeng na ka bynta ban ïoh ïa ka jaka kumba 2 akar jong ki shipai kaba don hajan Them Ïew Mawlong ban pynkynriah ïa ki briew ba sah ha Them Metor.
Haba kren bad ki lad pathai khubor ha ka Sngi Ba-ar, u Chief Secretary ka Jylla, Bah Donald P Wahlang u la ïathuh ba ka Sorkar Jylla ka la leit sha Delhi ban kyrpad ïa ka Sorkar Pdeng ban ai ïa ka jaka jong ki shipai kaba don hajan ka Ïew Mawlong, na ka bynta ban pynkynriah ïa ki briew na Them Metor.
“Ngi la ïakren bad ka Defence Ministry jong ka Sorkar Pdeng, ngi kyrmen ba ngin ïoh ïa ka jubab kaba bha. Ka jaka kaba ngi pan ka dei kaba rit, tang shu ïohpdiang ïa ka jubab, ngin ïaid noh shakhmat”, ong u Bah Wahlang.
Haba kylli u la ïathuh ba ïa mynta ka jingtyrwa ka long ban ïoh ïa ka jaka kumba 2 akar, hynrei lah ban pynduna sha ka 1 akar bad pyntip ba ka Sorkar kan pyrshang ban pyndonkam pura lut ïa katei ka jaka kat kaba lah.
Une u heh ophisar ka Jylla u la ong ba ka Sorkar Jylla ka la shim khia bha ban pyndep ïa kane ka kam.
U la ïathuh ba ha u Nohprah mynshem snem, u Myntri Rangbah ka Jylla ryngkat bad u Commissioner Secretary ka tnat Pynroi Sor ki la leit sha Delhi ban ïakren bad ka Defense Ministry halor kane ka kam, ha kaba u la pynpaw ka jingkyrmen ban ïoh kloi ïa ka jubab na ka Ministry. U la ong ba ka rai mynta ka shong ha ka Defense Ministry.
U Chief Secretary u la pynpaw ruh ba ka jingïakren bad baroh kiba donbynta ha kane ka kam kaba la long ha u Naiwieng ka la long kaba seisoh, bad pynpaw ruh ka jingkhmih lynti ban lah ban pynurlong ïa ka jingthmu ban pynkynriah ïa kiba shong ba sah ha katei ka jaka.
“Ngi ïakren bad baroh kiba don bynta ha u Naiwieng mynshem snem, ki la mynjur ïa ka jingtyrwa. Da ka jingpynkynriah ha katei ka jaka ba ngi pan na ki shipai, ka Gurudwara bad ki jaka mane Blei kiba don ha katei ka jaka kin ym shah ktah, kaba long ka jingïohnong lang ïa baroh”, la ong u Bah Wahlang.
Haba kylli, u Chief Secretary u la ong, kam don satia kano-kano ka jingbuh por halor katei ka kam, khamtam namar ba mynta ka shong ha ka Ministry, hynrei na ka liang jong ka Sorkar Jylla ka kan ïaleh katba lah ban pynstet ïa ka kam tang shu la ïoh ïa ka jubab na ka Sorkar Pdeng.
