Mawkyrwat, K’lyngkot 07
U Bah Medalsing Lyngdoh, kyrtong ka Congress ban ïa aireng ha ka ilekshon MDC na Mawkyrwat Konstitwensi u la ong ba ka jingjop ne jingrem ilekshon kam shong ha ka jingbun briew ha ki jingïalang hynrei ka shong ha ka por ne ka ïa kaba U Blei Nongbuh Nongthaw u la bynta ïa uno-uno u briew. U Bah Medalsing u la kren ïa katei ha ka jingïalang jong ka Mawkyrwat Block Congress Committee kaba la long ha ka 7 tarik u Kyllalyngkot 2025 ha Dorbar Hall Mawkyrwat.
U la pynkynmaw ruh ba ha ka ilekshon MLA ba la dep u la don ka jingkyrmen ban ïoh ïa ka jingjop lyngba ka lyer kaba beh sharum-shaneng bad lyngba ka jingïoh jingkheiñ ïa ki kyrteng na ki primary unit kaba la poi sha ka 14 ne 15 hajar hynrei ha ka por ñiew vote u la mad ïa ka jingrem namar ba ka don ka jingkylla bad kam pat dei ka por.
Kumta u la kyntu ïa ki nongïalam bad ïa ki nongkyrshan baroh ba kin trei shitom nangne shakhmat ha ki shnong ki thaw khnang ba ka Congress kan ïoh ïa ka jingjop ha kane ka kynti ba mynta.
U Bah Medalsing u la ïathuh ruh ba naduh ba u la rung sha ka Congress, u don ïa ka jingsngewskhem namar dei tang kane ka seng kaba don ïa ka jingkyrmen na ka bynta ka lawei jong ka ri bad ka jaidbynriew bad tang kane ka seng kaba lah ban ïaleh pyrshah ïa ka BJP. Namar kata, u kyrmen skhem ba ka Congress shen kan sa wan biang ha ka bor ban ïoh bat ïa u lakam synshar ha ka jylla bad ha Delhi.
Shuh shuh u la pynpaw ruh ba ka thong ba hakhmat eh lada u shah jied kum u MDC ka long ban wanrah ïa ki aiñ kiba khlaiñ ban ïada ïa ka khyndew ka shyiap ka riti dustur bad ban pynkhlaiñ ïa ki Dorbar Shnong. Nangta u la ïathuh ruh ba ki don shibun ki mat hynrei kaba donkam mynta ka long ban trei shitom shwa na ka bynta ban wanrah ïa ka jingjop.
Ha kane ka sngi la ïadonlang u Bah KV Kharlyngdoh, President DCC, SWKHD, Bah Manstudy Nongrem, CEM barim ka KHADC, Bah Phrin Wanniang, Adviser MBCC, Bah JM Lyngdoh, Working President DCC Bah Nicholas Tympuin, President MBCC bad kiwei kiwei.
