Cairo, K’lyngkot:
Katkum ki khubor, la ong ba ka jingleit hiar thma jong ka Israel da liengsuiñ, ka la shim ia ka jingim jong 6 ngut ki nong Palestine ha ki ar tylli ki jingleit hiar thma ba kyrpang jong ka sha Gaza Strip ha ka Sngi U Blei, kaba la kyntiew ia ka jingdon kiba khlad baroh sha ka 97 ngut tang hapoh jong ka shi taiew. Katba, ki nongpynïasuk jong ka US bad Arab pat ki dang ialeh shitom ban wanrah noh ia ka jingiasuk hapdeng ka Israel bad ka Hamas bad ban pynkut noh ia ka thma kaba jur hapdeng kitei arliang mamla ki bym lah shuh ban iasuk. Lada peit thuh ruh la i kumba kane ka thma kam don jingkut shuh hynrei ka la nang pur pynban sha kiwei de ki ri kiba ju ai jingkyrshan ia katei ka kynhun lehnoh Hamas jong ka Palestine.
Ki heh ka tnat ka koit ka khiah jong ka Palestine, ki la iathuh ba ka jinghiar thma jong ka Israel ha katei ka Sngi U Blei, ka la shim ia ka jingim jong 5 ngut ha kawei ka iing ha ka ktem ha Nuseirat kaba don hapdeng jong ka Gaza. Katba, ha kawei pat ka jingleit hiar thma jong ka Israel sha Jabalia, ka la shim ia ka jingim jong 4 ngut kiwei pat bad katei ka thaiñ ka don sha ka phang Shatei Mihngi jong ka nongbah Gaza, ha kaba ki shipai Israel ki la phai khmat ban ñion tyngeh ia ki dkhot ka Hamas kiba don ha katei ka bynta.
Kat ia mynta kam shym la don kano-kano ruh ka jingiakren mardor hapdeng ki heh nong-ialam ka Israel halor kitei ki ar tylli ki jingjia.
Ha ka thaiñ Sheikh Radwan jong ka nongbah Gaza pat, kiba haïing hasem bad ki para marjan, ki la leit mareh sha ka ïing jong ka longïing Zuhd, kaba la shah thombor ha ka liengsuiñ jong ka Israel, ha ka por janmiet jong ka Sngi Saitjaiñ, ha kaba 6 ngut ki la khlad noh ha katei ka jingjia. Hadien ba la wad bniah bha ia katei ka jingjia ha ka step ka Sngi U Blei, la shem ba ki dang don sa 4 ngut kiwei pat kiba la suba ba ki dang sahkut hapoh ki thliew ba la julor na ka jingther bom jong ki liengsuiñ ka Israel ha katei ka Sngi Saitjaiñ.
