Agartala, Kyllalyngkot:
U Zodintluanga, uba dei u National Executive Member jong ka All India Adivasi Congress Committee (AIACC), u la kynthoh ïa ka sorkar Modi, ba ka la kyntait ïa ki nongrim jong ka synshar paidbah bad ka la pynduhjait ïa ka hok jong ki Adivasi bad ki riew lum, khamtam eh ha ki jylla ba Shatei-lam-Mihngi jong ka ri India.
Haba kren kum u nongkren rangbah ha ka jingïalang jong ka jylla Tripura ha Ambassa ha Dhalai, u Zodintluanga u la khot ban pynduh noh ïa kaei kaba u la batai kum ka “jingkem ba donbor” ïa ka ri ban pynneh pynsah ïa ki jinglong kiba batai ïa ka synshar paidbah jong ka ri India.
Une u nongïalam barim ka Congress Legislature Party jong ka Mizoram, u la kynthoh ïa ki polisi treikam jong ka sorkar ba la ïalam da ka BJP, da kaba kynnoh ba ka jingsynshar kaba mynta, kam shym la lah ban pynneh ia ka hok jong ki jaitbynriew riewlum bad ki kynhun ba shah kyntait ha kylleng ka ri India.
“Hapoh ka jingïalam jong u Myntri Rangbahduh u Narendra Modi, ka mynsiem jong ka synshar paidbah ka la duh noh. Ka jingsynshar donbor jong u ka dei ban kut noh lada ngi kwah ban ïada ïa ki jinglong ba la tei ïa ka ri jong ngi,” ong u Zodintluanga.
U la ïaid shakhmat ban pynpaw ïa ki jingnoh synñiang ha ka histori jong ka seng Congress sha ka hok jong ki jaitbynriew riewlum, khamtam lyngba ki jingthmu ba kongsan kum ka Forest Rights Act of 2006, kaba u la kam ba ka pynthikna ïa ka jingithuh aiñ ïa ki Adivasi bad kiwei kiwei ki nongshong shnong ha ki jaka khlaw.
U Zodintluanga u la kynnoh ïa ka sorkar u Modi ba ka la pynsniew bad pynslem ïa ka jingpyntreikam ïa ka aiñ katba ka dang kyntiew ïa ki polisi kiba pynsuk ïa ka jingshim jaka ha ki jaka riewlum, kaba u la ong ba ka la pynlong ïa ki trai ri trai muluk ban pynkynriah jaka.
“Naduh ka por hadien ka jingsynshar phareng, ka seng Congress ka la kiew bha ha kaba ithuh ïa ka hok jong ki jaitbynriew riewlum, khamtam ha ki bynta kum ka hok khyndew, ka pule puthi, bad ka jingmihkhmat ha ka saiñ pyrthei. Hynrei ka sorkar NDA ba la ïalam da ka BJP ka la pynphai kylla ïa kine ki jingmyntoi”, u la ong.
U Zodintluanga u la kdew ruh sha ka jingthaw ïa ki District Council ba synshar hi ha ki jylla kum ka Meghalaya, Mizoram, bad Nagaland ha ka por ba synshar ka Congress, ba la shna khnang ban ai ïa ki jaitbynriew riewlum ïa ki rukom synshar shnong kiba pyni ïa ka jinglong kyrpang jong ki.
Ha ka jingïapher kaba khraw, u la sngewsih, ba ka sorkar u Modi kam shym la lah ban weng ïa ka jingbymsuk bad jingkynad kaba nang jur ha ki jylla kum ka Manipur, kaba, u la ong, mynta ka ïakynduh ïa ka “jinglong kaba kum ka thma.”
U la kynthoh ïa baroh ar tylli ki sorkar ba la ïalam da ka BJP ha ka sorkar kmie bad ka sorkar jylla ha Manipur ba ki leh khlem akor ïa ka jinglong jingman.
“Ka Manipur, kaba la ju long ka jylla kaba suk, mynta ka la shah rong noh ha ki kam thombor, bad ka sorkar u Modi, kam shym la leh eiei ban wanrah biang ïa ka jingsuk. Dei hapoh ka jingïalam jong u Rajiv Gandhi ba ka Mizoram ka la ïoh ïa ka jingsuk hadien ki snem jong ka jingïaleh pyrshah. Ka sorkar Congress, ka la wad ïa ka jingïasngewthuh jingmut, katba ka sorkar u Modi, ka pyndonkam ïa kajuh ka buit phiah bad synshar, kaba ki phareng ki ju pyndonkam ban synshar ïa ka India”, la ong u Zodintluanga.
Utei u Myntri sorkar barim jong ka Mizoram, u la kynthoh ruh ïa ka Citizenship Amendment Act (CAA), kaba ai ïa ka jinglong nongshong shnong India ïa ki phetwir ki bym dei ki Muslim kiba wan na Afghanistan, Bangladesh, bad Pakistan.
U la maham ba ka jingpyntreikam ïa ka CAA kan ktah jur ïa ka jingbun briew ha ka thaiñ Shatei-lam-Mihngi, kaba nang pynjah burom shuh shuh ïa ki jaitbynriew trai ri trai muluk.
“Ka aiñ pynkylla nongshong shnong ka dei kawei pat ka sienjam ban pynduhjait ïa ka jinglong tynrai jong ka kolshor bad ka jingbun briew jong ka thaiñ Shatei-lam-Mihngi. Ka jingshah pynjulor kan sa sngew thikna da ki paidbah jong kane ka thaiñ, khamtam eh ki jaitbynriew riewlum,” bynrap biang u Zodintluanga.
Ha ka jingkren jong u, u Zodintluanga u la lum jingkyrshan ïa ka Indian National Congress (INC), da kaba khot ïa kane ka seng kum ka “Custodian of the constitutional ethos jong ka ri India” bad kyntu ruh ïa ka jingïatylli hapdeng ki dkhot jong ka seng bad ki nongkyrshan.
“Kawei pa kawei ka kynhun jong ka Congress ka Pradesh ka don ka bynta kaba kongsan ha kane ka jingïaid lynti kaba pynkylla dur. Ryngkat, ngi dei ban kiew ban pynpra ïa ka jingsynshar donbor kaba la tap lup ïa ka synshar paidbah jong ngi hapoh ka jingsynshar jong u Narendra Modi,” u la ong.
“Ka por ka la dei ban pynmeh biang ïa ka jingshai jong ka hok, ka jingïaryngkat, bad ka jingïadon bynta lang kaba ki nongïalam nongseng jong ngi ki la thmu na ka bynta ka ri India,” u la bynrap.
Ha kane ka jingïalang kaba dang long ha ka 5 tarik u Kyllalyngkot, 2025, ha Ambassa, la ïohi ruh ïa ka jingdon lang u Sudip Roy Barma, u nongshah khot sngewbha ba pura sha ka kynhun treikam jong ka Congress, uba la pynkup burom ïa kane ka sngi kum u kongsan.
Ka jingkren ba sngewtynnad jong u Zodintluanga ka la pynpaw ïa ka jingangnud jong u ban ïakhun na ka bynta ka hok jong ki Adivasi bad ki jaitbynriew riewlum katba u dang pynksan ïa ka jingdonkam ban pynthymmai ïa ka synshar paidbah ha ri India.
